Press Release Dated Serchhip, the 28th July, 2025
Serchhipah bawlhhlawh sawngbawl dan chungchang inrawnkhawmna neih a ni
Dated Serchhip, the 28th July, 2025: PHE Department, Serchhip District buatsaihin vawiin khan bawlhhlawh sawngbawl dan chungchangah inrawnkhawmna neih a ni a. Serchhip DC Pu Paul L Khuma hovin Serchhip DC Pisapui Hall-ah programme buatsaih niin Serchhip District chhunga WATSAN Chairman leh Secretary te an tel a ni.
Pu Paul L Khuma chuan faina leh thianghlimna kawngah hma kan sawn theih nan, kan khawtlang tana tha rel turin inrawnkhawmna hun buatsaih a ni tih sawiin an khaw aiawha khawtlang hruaitu lo kal ten ngaihdan tha tak tak an neih ngei a beisei thu a sawi. Thingtlang khuaah bawlhhawlh sawngbawl kalpui tan a nih dawn tak avangin khawtlang hruaitute an pawimawh tak zet dawn, a ti a. Mipui mimir tel loin a hlawhtling thei lo tih hriain mahni khua theuhah vawiin an thil zir te hawn a, an khaw mipuite thinlung hneh tum theuh turin DC chuan a fuih a ni. Solid management hi thianghlimna leh faina laimu a ni tiin Serchhip DC Pu Paul L Khuma chuan an bawlhhlawh te, bawlhhlawh paihna hmuna chhungkhawm ngawt tawh loin, tunlai science thiamna hmangin mihring leh environment tana tha turin, tih riral a ni tawh dawn a ni, a ti a. He hmalakna hlawhtlinna tura thawhhopuiah kalkhawm te a sawm a ni.
DC chuan bawlhhlawh tihtlem kawnga tan la turin Serchhip District mipuite a ngen a. Kan bawlhhlawh tam tak hi thil tangkai dang siam nana hman nawn theih a ni thin a; chuvangin, a theih chin chinah bawlhhlawh neih tlem (reduce), hman nawn (reuse) leh thil dang siam nana hman tangkai (recycle) i tum ang u, tiin a fuih a ni.
PHED leh Green Herd SP te thawhhonain Serchhip District chhunga thingtlang khua zawng zawngah bawlhhlawh thliar hran a nih dawn bakah Green Herd SP te hian bawlhhlawh an khawn tawh dawn a. Bawlhhlawh phur motor tlan dan tur hetiang hian ruahman a ni:
Thawhtanni – Chhingchhip, Hualtu, Lungkawlh, Bawktlang, Lungchhuan leh Sialsir
Thawhlehni- Khawlailung, Piler, Hmunzawl, Thinglian, Keitum, Bungtlang
Nilaini – Vancheng, Sialhau, Thentlang, Baktawng, Chhuanthar Tlangnuam, Hmawngkawn, Chhiahtlang, Hmuntha, Khawbel
Ningani- Khumtung, Buhkangkawn, Chan In, Lungphon, Ngentiang, Rullam
Zirtawpni – Zote S, Kanghmun, Neihloh, Buangpui, Hriangtlang
Inrinni – Leng, Sailulak, Mualcheng, Chekawn, East Lungdar.
Vawiin meeting-ah hian khaw hrang hranga bawlhhlawh sawngbawl dan tur inhrilhhriatna awareness campaign neih dan tur te, bawlhhlawh dah khawmna hmun tur leh khawn dan tur te, bawlhhlawh sawngbawlna man chungchang te sawiho a ni a. Awareness campaign hi khawtin ah neih tha tih niin VC lamin Gram Sabha koin a tul angin PHE Dept lam ten an telpui anga; Sanitation fee thla tin ₹50 lak ni se; Sanitation point hi Green Herd SP leh VC ten ruahmanna an lo siam ang chu rin phawt ni se, a tul angin siamthat ngai siamthat leh ni se tiin an rel a ni.
Additional DC Pu Lalrinzuala kaihhruai he inrawnkhawmna hunah hian Er. Lalropuia Hmar, Director PMU, PHED Mizoram chuan solid waste management chungchang sawifiahna hun a hmang a. PMU Consultant, Green Herd SP leh PHED Serchhip aiawh ten thu an sawi bawk a ni.
Pr. No. 244/2025 (SCP) Dated Serchhip 28th July, 2025
Issued by District Information and Public Relations Officer; Serchhip District, Serchhip.
