Press Release Dated Serchhip, the 28th August, 2025

Serchhip District Level Red Ribbon School Quiz Competition neih a ni

Dated Serchhip, the 28th August, 2025: Vawiin khan Serchhip District Level Red Ribbon School Quiz Competition chu Serchhip Pisapui Hall ah neih a ni a. Presbyterian English School (High School Section) ten lawmman pakhatna an dawng a ni.
Red Ribbon Quiz hawnna inkhawmah khuallian Bawrhsap Pu Paul L Khuma chuan duhthlanna dik siam turin zirlai kalkhawmte a chah a. An nunah harsatna an a thleng a nih pawhin, duhthlanna dik thlang a, ruihhlo leh sual danga tlu lo turin a fuih a. HIV/AIDS leh mipat hmeichhiatna atanga inkai chhawn theih natna tha lo te an vei lohna tura inveng fimkhur tur leh mi dangte zirtirtu ni turin a sawm a ni.
Red Ribbon Quiz-ah hian Serchhip khaw chhung atangin Marian High School, Presbyterian English School (High School Section), Presbyterian English School (Middle Section), Chawngbuangi Memorial School leh Brilliant Higher Secondary School te an tel a. Serchhip khaw pawn atangin St Monfort School, Khumtung; Presbyterian English School, Baktawng leh Vantawng High School, Thenzawl te an tel a ni.
Quiz hi Class 8, 9 leh 11 zirlai te tana buatsaih a ni a. Serchhip District chhunga School hrang hrangah August ni 15 khan online quiz hi buatsaih a lo ni tawh a. A titha zual school 8 te vawiinah hian an inel a ni.
He Red Ribbon Quiz Competition hi District Aids Prevention Committee, Mizoram State Aids Control Society leh School Education tangkawp huaihawt a ni a. Naupang leh tleirawl te zingah nasa lehzuala HIV/AIDS chungchanga inzirtirna peng pawimawh tak pakhat niin HIV/AIDS leh mipat hmeichhiatna atanga natna inkaichhawn theih te a darh zel lohna tura School Education te nen tangkawpa hmalakna a ni.
Vawiin Quiz Competition-ah hian lawmman pakhatna dawngtu Serchhip Presbyterian English School (High School Section) te hian Rs. 7000 an dawng a. Pahnihna Marian High School, Serchhip te chuan Rs. 5000 an dawng a, pathumna Chawngbuangi Memorial School Serchhip te chuan Rs. 4000 an dawng. Lawmman pakhatna atanga pathumna dawngtute hian Citation leh Memento an dawng tel bawk a ni.

Pr. No. 282/2025 (SCP) Dated Serchhip 28th August, 2025
Issued by District Information and Public Relations Officer; Serchhip District, Serchhip.