Press Release Dated Serchhip, the 27th May, 2025
Serchhipa bawlhhlawh sawngbawl dan tur chungchang meeting neih a ni
Dated Serchhip, the 27th May, 2025: Vawiin khan Plastic Waste Management Centre, Lungrual ah Er. H. Duhkima, E-in-C, PHED kaihruaiin Solid Waste Management kal zelna tur chungchangah inhmuhkhawm a ni.
Chairman chuan Central Sawrkar atanga hnathawh tur lo kalte convergence-a thawh tura ruahman deuh vek a nih sawiin chu chuan eng emaw chenah harsatna a thlen thin thu a sawi a, a bik takin funding chungchangah harsatna a tam thin thu a sawi bawk. Chutih mek lai chuan Department pahnih ten thawh hona tha kan neih chuan hna tha taka a kal theih thu leh hmasawnna lian tak thlen thei a nih thu a sawi. PHE Department leh Rural VC ten bawlhhlawh sawngbawlna kawngah hian thawh hona thuthlung an neih tawh thu te, bawlhhlawh khawn chungchangah te leh fee lak danah te inremna siam a nih tawh thu a sawi bawk. Green Herd SP te leh PHE Department ten inremmna an siam zui thu sawiin, Green Herd SP te hian chak taka hma la zuiin tunah hian Plastic bawlhhlawh sawngbawl hna thawh tan theih tep a ni tih a sawi a, hemi atana mamawh khawl hrang hrangte pawh a hmunah bun fel a nih tawh thu a sawi bawk.
Er. H. Duhkima, E-in-C chuan, PHED leh UD&PA te chu Bawlhhlawh sawngbawlna hmun inngheng renga an neih dawn avangin thawkho lo thei lo an nihna te sawiin, kalkawng, tui leh power supply ah te thawhho ngai an nih thu a sawi a, heng bakah hian kawng hrang hrangah inlungrual taka an thawhho ngei a beisei thu a sawi. UD&PA lam te pawhin an motor te phal taka an hmantir theih tur thu an sawi avangin lawmthu a sawi bawk.
Serchhip DC Pu Paul L. Khuma chuan Serchhip mipuite hnenah nasa zawka Awareness campaign neih a la tul thu te, Department hran atanga funding kal hun inang lo avanga harsatna awm thei a nih avangin Department pahnih ten hemi atan a kan sum hmuhte Green Herd SP Private Agency ah chhung luh zel thaa a hriat thu a sawi.
Member kal ten Solid Waste sawngbawl chungchanga an tawnhriat leh an hmathlir hrang hrangte sawi in, invenna tur leh hmasawnna tur hrang hrang ngaihthlak a ni a. PHED leh UD&PA Department te bakah Green Herd SP leh VC te tangkawpin Awareness campaign Serchhip pumah ngawr tak kalpui nise, Solid Waste Management hmun te hi Private Firm te nen Agreement mumal tak siama enkawl tir chungchangte leh a theih ang anga heng private firm tihchangtlung dan tur an relte chu state level meeting ah thlen nise tih a ni.
Meetingah hian Additional DC Pu Lalrinzuala, DUDO Pu Gaston Vanlalhriatpuia, Green herd SP aiawhte bakah khawtlang hruaitute an tel a ni.
Pr No. 176/2025 (SCP) Dated Serchhip 27th May, 2025
Issued by District Information and Public Relations Officer; Serchhip District, Serchhip.
