Press Release Dated Serchhip, the 27th January, 2026

Serchhip District Sponsorship and Foster Care Approval Committee an thukhawm

Dated Serchhip, the 27th January, 2026: Vawiin khan Child Protection Services (Mission Vatsalya), Women and Child Development hnuaia Serchhip District Sponsorship and Foster Care Approval Committee chu DC Pu Paul L Khuma hovin a Pisa ah an thukhawm.

He meeting ah hian Serchhip district chhunga naupang chhawmdawl ngai mi 150 te chungchang ngaihtuah niin chhawmdawlna (sponsorship) pek rem tih a ni.

Mission Vatsalya hi sawrkar laipui hmalakna niin naupang venhim ngai leh enkawl ngaite hamthatna tur peng hrang hrang kalpui a ni a. Chung zingah chuan sponsorship leh foster care hi telin sum leh paia naupang chhawmdawl mamawh ngawih ngawih – nu leh pa nei lo, natna khirh vei te leh harsatna khirh tak dang tawktute hnenah chhawmdawlna hi pek thin a ni a. Dilna thahneem tak lut thin te hi District Sponsorship and Foster Care Approval Committee chuan uluk taka enfiahin, chhawmdawlna dawng awm mi an ni em tih an zir chian hnuah dawng awma an ngaih te pek thin an ni a. He Committee hian sponsorship dawngtuten a hmanna tur dik takah an hmang em tih an vil zui bawk thin a ni.

He meeting ah hian District Child Protection Officer Pi R. Lalramdinmawii, Protection Officer (Non institutional care) Pi Vanlalmuanpuii, Child Welfare Committee Chairperson Pi Lalthlamuani leh Sub headquarter MHIP President Pi Lianthangi te an tel a ni.

Pr. No. 24/2026 (SCP) Dated Serchhip 27th January, 2026
Issued by District Information and Public Relations Officer; Serchhip District, Serchhip.