Press Release Dated Serchhip, the 27th August, 2025
BSF lak tur chungchanga hriattur pawimawh
Dated Serchhip, the 27th August, 2025: Mizoram atangin BSF Constable (GD) 300 lak a ni dawn a, Centre pathum – Serchhip, Aizawl leh Lungleiah atangin mi 100 theuh lak an ni ang. Vawiin khan hemi chungchang sawiho hian DC Pu Paul L Khuma, SP Pu Gavit Gogna, BSF hotute leh mi pawimawh dangte Serchhip DC Meeting Hall-ah an thukhawm.
Serchhip Centre hian District pathum – Serchhip District, Khawzawl District leh Champhai District te a huam dawn a. Heng District pathum atang hian kum 18-28 inkar ten an dil thei anga, 02.08.2025 hmalama piang emaw 01.08.2007 hnulama piang te tan dil theih a ni lo ang. Zirnaah pawl 10 pass chin an ni tur a ni a. San zawngah mipa 157cms (ft5.15), hmeichhia 147.5cms (ft 4.83) tal an ni tur a ni.
Dilna form hi Serchhip DC office ah lak theih a ni a. Social media kaltlangin pdf thehdarh a nih bakah BSF Website link https://rectt.bsf.gov.in/static/bsf/pdf/180825_MC.pdf atanga download theih a ni bawk.
NCC ‘C’ Certificate nei te tan 5% mark belh sak an ni anga, B Certificate nei tan 3% leh A Certificate nei tan 2% belh sak an ni ang.
Recruitment Centre hi Serchhip Sports Complex a ni dawn a. September ni 2 atanga September ni 18 (sawrkar chawlh tiam lohin) chhungin form fill up sa nen Serchhip Sports Complex ah hian kal tur a ni a, an form te endik sak an ni anga physical test atan admit card pek an ni bawk ang. Passport size photo bakah education certificate, ST Certificate leh Aadhaar/VoterID/Ration Card xerox copy ken tel tur a ni a. Heng xerox copy te hi mahnia attest (self attest) pawm a ni ang.
Physical Test hi September 23 atanga October 9 thleng neih tur a ni a. Written Exam hi October 18 ah neih tur a ni ang. Written Result hi October ni 18 ah puan a ni anga. Medical Exam hi October 27 atanga November 4 chhung neih a ni ang. BSF Constable a tling te result hi November ni 10 ah puan a ni ang.
Pr. No. 280/2025 (SCP) Dated Serchhip 27th August, 2025
Issued by District Information and Public Relations Officer; Serchhip District, Serchhip.
