Press Release Dated Serchhip, the 26th January, 2026

Serchhipah Republic Day vawi 77na lawm a ni

Dated Serchhip, the 26th January, 2026: Ram chhung hmun dangte rualin vawiin khan Serchhip District chhung hmun hrang hrangah India Republic Day vawi 77-na lawm a ni a. Serchhip District chhunga a lawmna pui ber chu Serchhip Sports Complex-ah neih niin khuallian, Serchhip DC Pu Paul L Khuma chuan hnam puanzar a pawt pharh a ni.

Serchhip DC Pu Paul L Khuma chuan Serchhip District hmasawnna tura kawng hrang hranga sawrkar hmalak dan a sawi a. Serchhip Town Beautification Project kalpui a nih dan te, Department hrang hrangte leh VC-te nen thawk hoa cheng nuai 153.58 senga Serchhip khawpui c cheithat leh cheimawi hna thawh a nih thu te; State Collaboration Initiative kaltlanga Serchhip District-in Sawrkar Laipui DARPG kaltlanga cheng nuai 60 senna tur District Plan and Project Monitoring System project an hmuh thu te, proposal thehluh zingah Mizoram atanga thlan awm chhun a nih thu te a sawi a ni. Mizoramah a hmasa ber ni turin District mipuiten harsatna awlsam taka thuneitute hnena an thlen theihna tur Vantlang Viltu App chungchang te, Nasha Mukt Bharat Abhiyan hnuaiah District Administration hmalaknaa sawrkar, tlawmngai pawl leh kohhran zawng zawng te tanhona camping buatsaih a nih tur thu te a sawi a. The Mizoram Bana Kaih (Handholding) Scheme hnuaiaa sawhthing lei leh hralh chungchang pawh sawi langin DC chuan sawrkar kum kalta chhungin sawhthing quintal 86,770.16 lei nan cheng vaibelchhe 24.33 release a nih thu a sawi bawk. Heng bakah hian khuallian Pu Paul L Khuma hian sawrkar department hrang hrangte hmalakna a sawi bawk.

Vawiin Republic Day lawmna, Serchhip Sports Complex-a neihah hian Parade Contingent 13 (Unarmed 5 leh School 8) an tel a, Assam Rifles Band Party te an tel bawk. Parade Commander hi Inspector R Lalbiakhlua a ni a. School Contingent ah hian Goodwill English Academy te chuan lawmman pakhatna an dawng a; pahnihna Little Flower Convent School niin pathumna chu Brilliant Higher Secondary School te an ni a. Unarmed Contingent ah Marian High School NCC Air Wing te chu pakhatna an ni a; Govt. Serchhip College NCC Air Wing ten lawmman pahnihna an dawng a, Little Flower Convent School Scouts & Guides ten lawmman pathumna an dawng a ni.

Serchhip District UD&PA buatsaih VC area fai inelnaa tithate hnenah vawiin hian Khuallian Pu Paul L Khuma’n lawmman a sem a. Pakhatna – Vengchung VC, pahnihna – Chhiahtlang North VC, pathumna – New Serchhip North VC te an ni. UD&PA buatsaih vekin Swachh Bharat Mission 2.0 (Urban) hmalaknaah mahni mimal hlawkna um lova faina kawnga hma la tha ‘Swachhata Champion’ mi 21 te hnenah chawimawina pek a ni bawk a. Chungte chu: – C.Vanlalmalsawma, Serchhip Vengchung; Lalnghakmawia, Serchhip Vengchung, Lalthianghlima, Serchhip Vengchung; Remruatkima, Serchhip Vengchung; Lalthianghlima Colney, Serchhip Vengchung; Lalnunhlimi, Serchhip Vengchung; C Lalrawna, Chhiahtlang Venghlun; Lalremruatkima Colney, Chhiahtlang Venghlun; Lalremruata Ralte, Chhiahtlang Venghlun; H Lianhrima, Serchhip Hmar Veng; Lalzaua, Serchhip Hmar Veng; PC Lianrengpuii, Serchhip Hmar Veng; H Lalrawngbawla, Chhiahtlang Kawn Veng; R Lalrinthanga, Chhiahtlang Chhim Veng; Lalzarzova, Chhiahtlang Bukpui; R Ronghaka, New Serchhip Venglai; R.Kapzauva, Sihphir Veng; Rualzakhuma, New Serchhip Bazar; K.Rodinga, Sihphir Veng; Rohmingthanga (Tetea), Serchhip Bazar leh Oscar J Rama, Ramthlun Veng te an ni.

District Child Protection Unit buatsaih reels insiamsiak lawmman sem bawk niin lawmman pakhatna dawngtu chu Lalhriatpuii, East Lungdar; pahnihna – C Vanlalhriatpuii, Serchhip Hmar Veng leh pathumna – Zoramthanga Ralte, Serchhip Hmar Veng te an ni.

Republic Day DC’s Volleyball Running Trophy lawmman sem niin Hmeichhiaah New Serchhip Volleyball Club an champion a; mipaah Vengchung Volleyball Club te an champion thung a ni.

Pr. No. 23/2026 (SCP) Dated Serchhip 26th January, 2026
Issued by District Information and Public Relations Officer; Serchhip District, Serchhip.