Press Release Dated Serchhip, the 24th March, 2026
Serchhipah Handholding Scheme Workshop neih a ni
Dated Serchhip, the 24th March, 2026: Vawiin khan Serchhip DC Pisapui Hall ah District Level Workshop on Handholding Scheme buatsaih a ni a. Serchhip DC Pu Paul L Khuma chu he programme ah hian Chairman niin Mizoram State Policy Coordination Committee (MSPCC) member te leh Handholding Scheme CEO ten hun an hmang a ni.
Workshop-ah hian CEO Pu Lalfakzuala chuan Handholding Scheme chungchang a bulthum atanga chipchiar taka sawiin CM Special Package chu loan la thei dinhmuna ding ve lote tana pek an nih thu leh loan component ah chuan cheng nuai 50 thleng loan dil theih a nih thu a sawi a. Online hmangin englai pawha dil theih a nih thu te, dil hun bi a awm loh thu te, a dawng zat tur bithliah a awm loh thu te a sawi a. Online hmanga dil dan thiam lote tan pawh Serchhip DC Office, SDO leh BDO hrang hrangte Office ah kalin, an tanpui theih reng thu a sawi. Handholding kaltlanga loan hmuh that bikna sawifiahin CEO chuan kum tina Annual Guarantee Fee (AGF) pek ve a ngaih loh thu te, loan rul tha te chu thla 6 hnu zelah an loan laka pung (interest) chu sawrkarin a rulh let leh thin thu a sawi a. A diltu hi kum 18-60 inkar, CIBIL Score 700 aia hniam lo, chhungkaw pakhatah mi pakhat zel tan dil theih a ni.
Kisan Credit Card chungchang sawifiahin CEO Pu Lalfakzuala chuan KCC loan hi loneitu tana duan a nih thu te, cheng nuai 2 chinah dahkham leh guarantor a ngaih loh thu te, loan pung zat 7% atanga 3% chu loan rul tha te hnenah sawrkar laipuiin a pe let dawn, tih te a sawi a. Bana Kaih policy nena kaihkawpa dil thei te chu kum 18-60 inkar an nih a ngai a, Sawrkar Laipuiin 3% a rulh bakah Bana Kaih atangin sawrkarin 4% chu farmer te a rul let dawn a; a pung engmah rulh ngai loin KCC leh Bana Kaih kaihkawp hmang hian farmer ten loan an la thei a ni. KCC loan dil nan document tam tak – entirnan DPR, Qoutation leh a dangte a ngai ve lo a. Loan hi rulh zawh a nih chuan, a tir atanga dilna buaipui that leh ngai lovin kum 5 a ral hmain lak nawn leh mai theih a ni bawk. CEO chuan Bana Kaih hnuaiah KCC dilna hi chak zawka kalpui a nih theih nan ruahmanna siam a nih thu a sawi bawk.
Mizoram State Policy Coordination Committee (MSPCC) member Pu Zohmingthanga leh Pu Lalchhuanawma Hrahsel te pawhin thu sawiin Handholding chu hmalak tak tak tum, kal ngaihna hre si lo te kaihchhuahna tura sawrkar ruahmanna a nih thu an sawi a. Serchhip District ah loan component diltu an la tlem hle a, a tam thei ang berin dil se an duh thu sawiin, line department te pawh Bana Kaih loan diltute dinhmun dik tak zirchiang tur leh progress partner te an hlawhtlin theih nan tanpui turin an chah bawk a ni.
Lead District Manager report-a a lan danin Serchhip District a bank hrang hrangah Bana Kaih hnuaia loan dilna hi 32 a lut tawh a, chung zinga 29 te chu bank in an pawm sak hnuah sanction fel a ni tawh a. Loan an pek chhuah zat belhkhawm hi cheng nuai 288.79 a tling tawh a ni.
Vawiin programme DC Pu Paul L Khuma kaihhruaiah hian SDO (Sadar) Pi Rebecca Laldinmawii Hrahsel, District Monitoring Committee Member Secretary chuan Serchhip District dinhmun report a pe a. Sawrkar official te bakah VC te, progress partner te, bank aiawh te leh mi pawimawh dang te an tel a ni.
Pr. No. 89/2026 (SCP) Dated Serchhip 24th March, 2026
Issued by District Information and Public Relations Officer; Serchhip District, Serchhip.
