Press Release Dated Serchhip, the 23rd July, 2025

Serchhip District chhunga CM Special Package dawngtute tan training buatsaih

Dated Serchhip, the 23rd July, 2025: The Mizoram Bana Kaih (Handholding) Scheme hnuaia Serchhip District chhunga CM Special Package dawngtute tan vawiin atanga tanin ni hnih chhung training neih a ni dawn a. Vawiin khan Serchhip DC Pu Paul L Khuma hovin Serchhip DC Pisapui Hall-ah a hawnna hun neih a ni.
Pu Paul L Khuma chuan Mizoram sum leh pai, ei leh bar dinhmun siamthatna turin sawrkarin an banah kaiin, hmasawnna atana thawhpuiah CM Special Package dawngtu tur progress partner a thlang chhuak a; he scheme hlawhtlinna tur mawhphurhna sang tak chu a dawngtute koah a innghat a ni, a ti. Tanpuina dawngtuten leirem an rah theihna tur nia an beisei, hmalakna tur an chhawpchhuah te sawrkarin a ring tawk a, a pawmpui a; sum leh pai an dawn turte chu dik tak leh rinawm taka hmang turin DC chuan a chah a. Deparment tin ten an hnuaia tanpuina dawngtute uluk takin an vil zui dawn a, hemi piah lamah hian a dawngtuten an sum dawnte a thlawna luanral tir lo a, hmasawnna rahbi thar an kai ngei theihna tura tangkai taka hmang turin a fuih a ni.
Vawiin training-ah hian Serchhip District chhunga Agriculture, Fisheries, Sericulture, AH&Vety leh Soil Department kaltlanga CM Special Package dawngtu mi 197 te an tel a. Handholding Scheme nih phung leh sumdawnna chungchang Dr C Vanlalchhanhimi, SDC chuan a zirtir a. Accounts Officer Pi Anne Lalhriatpuii’n sum leh pai vawn dan a zirtir a, bank loan chungchang MRB Serchhip Branch Manager Pi Lalnunsangi hnen atangin ngaihthlak a ni a. Hei bakah hian Solar Electric Light Company (SELCO) aiawhten kalkhawmte an zirtir bawk a ni.
Serchhip District chhungah hian Agriculture hnuaiah mi 14, AH&Vety hnuaiah mi 127, Commerce and Industries hnuaiah mi 140, Fisheries hnuaiah mi 36, Horticulture hnuaiah mi 58, Soil hnuaiah mi 10, Sericulture hnuaiah mi 6, I&PR hnuaiah mi 1 in CM Special Package an dawng a. Naktukah hian Commerce and Industries, Horticulture leh I&PR hnuaia tanpuina dawngtute an training ve thung dawn a ni.
Programme hi Additional DC Pu Lalrinzuala’n a kaihruai a. Training-a tel zawng zawngte hnenah hian certificate semchhuah a ni a. Zawhna leh chhanna hun hman a ni bawk.

Pr. No. 238/2025 (SCP) Dated Serchhip 23rd July, 2025
Issued by District Information and Public Relations Officer; Serchhip District, Serchhip.