Press Release Dated Serchhip, the 23rd January, 2025

Revenue thuneihna kenkawh kawnga SDO (C) tha tihchak dan tur ngaihtuahin Minister Pu B Lalchhanzova’n Thenzawl a tlawh

Dated Serchhip, the 23rd January, 2025:  Revenue thuneihna kenkawh kawnga SDO (C) tha tihchak dan tur ngaihtuahin Minister Pu B Lalchhanzova’n Thenzawl a tlawh
Thenzawl Civil Sub Division tichak a, SDO (Civil) Office in Revenue thuneihna an kenkawh dan tur ngaihtuahin vawiin khan Revenue Minister Pu B Lalchhanzova chuan Thenzawl SDO (C) Office a tlawh a. Revenue Secretary Pu Vanlalmawia, Serchhip DC Pu Paul L Khuma leh mi pawimawh dang ten an tawiawm a ni.
Revenue Minister Pu B Lalchhanzova chuan revenue kalphung siam thatna kawngah Deputy Commissioner atangin bul kan tan a, DC Administration zawng zawng kan rawn ti revenue a, mipui leh sawrkar tana hmasawnna duhawm tak administrative reform kan thlen thei hi ka lawm hle a ni, a ti. District a Settlement Officer in thuneihna a neih ang zawng zawng kha SDO (C) hian ama huam chhungah a nei ve dawn ta a, mipui harsatna tawh thin tam tak a sukiang dawn a ni, Minister chuan a ti a. SDO (C) Thenzawl chuan Sub Registrar Office mawhphurhna a neih belh tawh dawn a, Vairengte leh Thenzawlah bultanin Mizoram puma Civil Sub Division zawng zawngah kalpui vek a ni dawn a ni, a ti.
Pu B Lalchhanzova chuan Revenue Department siam tha turin tan an lak dan a sawi a. Tun dinhmunah engemawchen danglamna thleng tawh mah se, fel lo lai leh siam that ngai a la tam hle a; staff indaih lohna te, inrelbawlna leh hna thawh dan phung siam that leh chinfel ngai a la tam tih a sawi a. An sawrkar kum chanve chhunga Revenue leh Supply Department hnuaia an hmalakna te a bua siam a nih tur thu a sawi bawk.
Secretary Pu Vanlalmawia chuan Revenue Administration tichak tura an hmalakna sawiin DC Office a bul an tan thu leh DC chu District Revenue Administration ah thuneihna sang zawk pek a nih thu a sawi a. Anmahni Sub Division huam chhungah SDO (C) te pawh Assistant Commissioner (Revenue) tia designate an ni a; District Headquarters a kal kher ngai loin stamp & registration ah te, revenue court leh land survey and settlement ah anmahni bial chhungah revenue thuneihna an nei tawh dawn a ni, a ti.
Revenue Director Pu R Lalthazuala chuan an hmalak dan tur leh ruahmanna an siam dan te a sawifiah a. SDO (C) Thenzawl ah bul tanin SDO (C) office chu Revenue Office leh Sub Registrar Office tak tak anga thawk turin Office building leh thawktute quarters tihlen leh sak belh a ni dawn a, staff te pawh dah belh an ni dawn a, land records te pawh Serchhip atangin Thenzawlah transfer a ni dawn, tih a sawi.
Vawiin vek khan Serchhip DC Pu Paul L Khuma kaihhruaina hnuaiah Thenzawl Golf Course ah Revenue Minister Pu B Lalchhanzova chuan Thenzawl khawtlang hruaitute, tlawmngai pawl hruaitute leh mipuite a kawm a. Thenzawl mipuiten SDO (Civil) Office tha chakna an hman tangkai dan turte, Civil Sub Division-in revenue thuneihna a neih belh dawn tak avanga mipui mimir tana awlsamna a thlen dan tur te, Thenzawl leh a chhehvel khua ten an chhawr tangkai dan tur an hriatthiam theih nan chipchiar taka inhrilhfiahna hun an hmang a ni.

Pr. No. 21/2026 (SCP) Dated Serchhip 23rd January, 2026
Issued by District Information and Public Relations Officer; Serchhip District, Serchhip.