Press Release Dated Serchhip, the 23rd December, 2025

Serchhip DC in Good Governance Week 2025 a hawng

Dated Serchhip, the 23rd December, 2025: Serchhip DC Pu Paul L Khuma chuan vawiin khan Serchhip DC Pisapui Hall ah Good Governance Week 2025 a hawng.
DC chuan sawrkar hnathawk te awm chhan chu mipuite tan a ni, a ti a. Kan hna theuhah mipuite tana awlsamna leh hahdamna thlentu tur kan ni a, chumi thinlung pu chuan hna kan thawk tur a ni, a ti. Good Governance chuan taimakna, inpekna, rinawmna, mawhphurhna lak ngam te langtlang sawrkar siam te a keng tel tih sawiin chu chu kan hna theuhah kan lantir tur a ni, a ti a. Sawrkar hnathawkten kum tluana an hnathawh dante thlir letin, kan hna theuhah Good Governance kan nun chhuahpui em tih ngaihtuah turin Pu Paul L Khuma chuan kalkhawmte a chah a. Kum tharah tun aia nasa lehzuala inpekna nena hnathawk tur leh, hruaitu tha nih tum theuh turin a fuih a ni.
India ram pumah Good Governance Week hi December ni 19 – December ni 25 chhungin hman tur a ni a. India ram hmun dangte rualin Serchhipah pawh he hun hi hman niin District Transport Officer (DTO) Pu Vanlaldika’n Transport Office ah hian online (vahan &sarathi) hmanga mipuite tana awlsamna an siam dan a sawi a. SDC Pu Vanthangpuia ten Good Governance Initiatives tih thupui hmangin powerpoint presentation a pe a thung.
Good Governance hnuaiah Serchhip DC office hmalaknain District mipuite harsatna chin fel nan leh awlsam taka thuneitute hnena vuivaina mipuiten an thlen theih nan Vantlang Viltu App duan niin hei hi 18 June, 2025 khan Chief Minister chuan a hawng. Vawiin thlengin tangkai taka hman chhunzawm zel a ni a, District anga hetiang application nei hmasa ber leh awm chhun qn ni. DC online portal hmangin Tribal Certificate, Residential Certificate, Income leh Delayed Birth Certificate te dil theih a ni bawk. District Plan and Project Monitoring System duan mek niin hemi hmang hian department te hmalakna hrang hrang online a vil a ni dawn a. Kum thar February thlaa hman tan tum a ni.
Vawiin programme ah hian Serchhip SP Pu Gavit Gogna bakah sawrkar hnathawkte leh khawtlang hruaitute an tel a. Additional DC Pu Lalrinzuala chuan programme hi kaihhruaiin SDO (Sadar) Pi Rebecca Laldinmawii Hrahsel chuan lawmthu sawina hun a hmang a. Serchhip District Beautification Project 2025 documentary film tawi, Serchhip DIPRO Office buatsaih chu tihchhuah a ni bawk a ni.

Pr. No. 397/2025 (SCP) Dated Serchhip 23rd December, 2025
Issued by District Information and Public Relations Officer; Serchhip District, Serchhip.