Press Release (Dated Serchhip, the 22nd July, 2025)

Serchhip District Hospital sak mek chungchang sawiho

Dated Serchhip, the 22nd July, 2025: Khum 100 awm theihna tur Serchhip District Hospital sak mek chungchang sawihoin vawiin khan Serchhip DC Meeting Hall ah thuneitute an thukhawm.
DC Pu Paul L Khuma chuan Serchhip District mipuiten hospital thar an mamawh tawhzia sawiin a mawhphurtuten mahni huang theuhah theihtawp chhuah turin a fuih a. Central leh State in an hmalaknate an vil reng a, bialtu MLA leh Mizoram Chief Minister ni bawk Pu Lalduhoma pawhin hospital sak mek hmasawn dan a ngaihven reng tih a sawi a. Serchhip District mipuite tana rotling, hospital tha tak a rang thei ang bera sak zawh a nih theih nan tan la turin a chah a ni.
Serchhip District Hospital sak mek hi Block A leh Block B ah then niin Block A hi PGCIL CSR Fund atangin cheng vaibelchhe 21 senga sak mek a ni a. A sak dan tur ruangam siamthat a nih avangin PGCIL te pawm turin design thar hi thawn thlak mek a ni a. PGCIL hian Mizoram sawrkarah zawhna hrang hrang an neih te chu Health Department-in a chhanna a thawn fel tawh a. PGCIL te hian an pawm a nih chuan thawhhona thuthlung Memorandum of Understanding an ziak anga. He MoU ziah fel a nih atanga chhiarin Block A bik hi thla 18 chhunga peihfel hman beisei a ni. Tun dinhmunah a chhawng hnuai ber chhuat chhun zawh tawh a ni a. Ist floor chhunna tur ban tung fel tawhin a beam chhun zawh a ni tawh bawk a, kar tawpah emaw kar thar bul lamah Ist floor hi chhun hman beisei a ni.
PWD lam chuan hospital sak hna hi uluk takin an vil a. Contractor-te bungraw hman a tha tawk em tih finfiahna (test) a hun takah an nei thin a. Tun thlengin Contractor te hian test hi an la paltlang thei zel tih meeting ah hian ngaihthlak a ni.

Block B hi DoNER Ministry hnuai North East Special Infrastructure Development Scheme (NESIDS) atanga sak a ni dawn a. Cheng vaibelchhe 50 senna tur concept paper pawm fel tawh niin DPR buatsaih mek a ni.
Vawiin meeting-ah hian Directorate of Health & Medical Education (DHME) Joint Director Dr Ruth Lalmuanpuii, Sr.Chief Medical Officer, District Medical Superintendent, PWD, P&E, I&PR hotute bakah Serchhip Town Development Committee, Serchhip NGO Coordination Committee, Serchhip Joint Action Committee leh contractor te an tel a ni.

Pr No. 237/2025 (SCP) Dated Serchhip 22nd July, 2025
Issued by District Information and Public Relations Officer; Serchhip District, Serchhip.