Press Release Dated Serchhip, the 21st August, 2025

Serchhip DC hoin naupang chhawmdawl ngaite chungchang ngaihtuah

Dated Serchhip, the 21st August, 2025: Child Protection Services(Mission Vatsalya), Women and Child Development hnuaia Serchhip District Sponsorship and Foster Care Approval Committee chu an Chairman Pu Paul L Khuma, Serchhip DC hoin vawiin khan a pisaah an thukhawm.
Vawiin meeting-ah hian Serchhip District chhunga naupang chhawmdawl ngai rawtna lutte member ten an enho a. An dinhmun ngaihtuah chungin naupang 40 te chu chhawmdawlna pek ni se, tiin an rel a ni.
Mission Vatsalya hi sawrkar laipui hmalakna niin naupang venhim ngai leh enkawl ngaite hamthatna tur peng hrang hrang kalpui a ni a. Chung zingah chuan sponsorship leh foster care hi telin sum leh paia naupang chhawmdawl mamawh ngawih ngawih – nu leh pa nei lo, natna khirh vei te leh harsatna khirh tak dang tawktute hnenah chhawmdawlna hi pek thin a ni a. Dilna thahneem tak lut thin te hi District Sponsorship and Foster Care Approval Committee chuan uluk taka enfiahin, chhawmdawlna dawng awm mi an ni em tih an zir chian hnuah dawng awma an ngaih te pek thin an ni a. He Committee hian sponsorship dawngtuten a hmanna tur dik takah an hmang em tih an vil zui bawk thin a ni.
He meeting ah hian District Child Protection Officer Pi R.lalramdinmawii, Child Welfare Committee Chairperson Pi Lalthlamuangi, Serchhip Sub-Headquarters MHIP President Pi Lianthangi leh Protection Officer Pi Vanlalmuanpuii te an tel a ni.

Pr. No. 273/2025 (SCP) Dated Serchhip 21st August, 2025
Issued by District Information and Public Relations Officer; Serchhip District, Serchhip.