Press Release Dated Serchhip, the 20th March, 2025
Serchhipah October-December, 2024 chhunga bank te hnathawh thlirlet.
Dated Serchhip, the 20th March, 2025: Vawiin khan October-December, 2024 chhunga Serchhip District khaw hrang hranga Bank te hnathawh dan thlirletna District Level Committee neih a ni a. Serchhip DC Pu Paul L Khuma kaihhruaina hnuaiah he meeting hi Serchhip DC Meeting Hall-ah neih a ni.
Serchhip District chhungah hian SBI, MRB, MCAB, PNB, HDFC leh NEFSB ten Branch an nei mek a. Heng bank hrang hrang tea mipuite sum dah Deposit tling khawm chu cheng nuai 53574.32 a ni a, loan an pek chhuah zat tling khawm chu cheng nuai 39811.20 a ni. Report atanga a lan danin December quarter bikah Serchhip District chhunga bank hrang hrang te deposit hmuh zat atanga mipuite hnena an puk tir (loan) zat Credit Deposit Ratio chuan 1.39% in hma a sawn a, 74.31% a ni mek a. Quarter hmasa nena khaikhina CD ratio a tlahniam bank pangate chu an hniam chhan sawifiah tir niin tan la turin ngen an ni.
December quarter chhung hian Serchhip District a bank ten priority sector-a loan an pekchhuah zat target za zelah 73.47% an tlin tawh a. MSME ah hian target za zelah 79.72% an tlin tawh a, ngaih pawimawh zual bik priority sector hnuaia hian an loan pekchhuah tur target 64.20% an tlin tawh a ni.
Priority Sector bikah District chhunga bank hrang hrang atanga loan puk mi 7701 an awm a, heng zinga mi 449 te hian an rul tha lo a. Loan chhia (Non Performing Assets) tlingkhawm hi cheng nuai 997.06 a ni. Bank te hi an NPA neih dan line department te hnenah hrilhhriaa, recovery drive neih kawngah intanpui tawn turin meeting chuan a rel a ni.
Bank te hian thlatin vawi khat tal financial literacy campaign nei tura bituk an ni a. Serchhip District ah October-December 2024 chhungin belhkhawmin bank te hian campaign vawi 44 an nei a ni.
Vawiin meeting ah hian Lead Bank Manager Pu Robert Z Parte bakah Serchhip District chhunga Bank Branch hrang hrang Manager te leh Department thenkhat aiawhte an tel a ni.
Pr No. 100/2025 (SCP) Dated Serchhip 20th March, 2025
Issued by District Information and Public Relations Officer; Serchhip District, Serchhip.
