Press Release Dated Serchhip, the 19th June, 2025

August thlaah Serchhipah bawlhhlawh thliar hrang tan dawn

Dated Serchhip, the 19th June, 2025: Vawiin khan Serchhip DC Pu Paul L Khuma hoin Serchhip Pisapui Meeting Hall-ah Serchhipa bawlhhlawh sawngbawl leh thliar hran dan tur ruahmanna sawiho a ni a. A bul tan nan August thla tirah pilot project angin New Serchhip North leh South VC huamchhungah kalpui ni se, tiin an rel.
PHE, UD&PA leh Greenherd Pvt. Ltd te tanhonain Serchhip leh Chhiahtlangah bawlhhlawh thliar leh sawngbawl kalpui a ni dawn ta a. Greenherd Pvt. Ltd te leh UD&PA te chuan bawlhhlawh lakkhawm leh paih hna an thawh dan her danglamin, chhungkaw tinte kawtkaiah bawlhhlawh hi an lakkhawm sak thin a nga. Bawlhhlawh tawih thei (wet) leh tawih thei lo (dry) te chu bawm hrangah dahin mahni in theuhah thliar hran tur a ni tawh ang.
Ruahmanna ang chuan July thla chhung hian mipui zirtirna uar taka kalpui a ni a nga. Khawtlang hruaitute leh tlawmngai pawlte phungbawmah sawmin UD&PA chuan a bul an tum a nga. July thla tawpah a tihchhinna (trial run) neih hman tum a ni a. August thlaah New Serchhip North leh South ah a takin kalpui tan phawt tum niin veng dangah a tahtawlin kalpui zel a ni ang.
Greenherd te chuan an bawlhhlawh sawngbawlna hmun New Serchhip Lungrual ramah bawlhhlawh hi an lakhawm a nga. Sawrkar dan zawm chungin mipui hrisel zawkna tur leh thianghlimna kawnga hma kan sawn theih nan bawlhhlawh mumal takin an tiral tawh dawn a ni. Serchhip District chu sawrkar leh mimal firm thawhhonaa bawlhhlawh sawngbawl hna mumal taka kalpui thei hmasa ber – model district a nih theih ngei a beisei thu DC Pu Paul L Khuma chuan a sawi a ni.
Vawiin meeting-ah hian PHED, UD&PA, I&PR, Greenherd leh District thuneitute an tel a ni.

Pr No. 200/2025 (SCP) Dated Serchhip 19th June, 2025
Issued by District Information and Public Relations Officer; Serchhip District, Serchhip.