Press Release (Dated Serchhip, the 18th July, 2025)

Thenzawl JNV School chungchang sawiho

Dated Serchhip, the 18th July, 2025: Vawin khan Thenzawl Jawahar Navodaya Vidyalaya (JNV) School dinhmun leh hmasawn zel dan tur ngahtuahin Serchhip DC Pu Paul L Khuma hovin District thuneitute an thukhawm.
JNV School hian an school-in naupangte zirna tihmasawn tura tan an lak dan te, zirlaibu piah lamah kawng tinrenga puitlinna kawng an zawh theihna tur leh thiam thil danga hma an sawnna tura naupangte an kaihhruai dan kawng hrang hrangte powerpoint hmangin an hrihfiah a. Committee member te chuan JNV hmunhma leh an hmanrua te bakah, an harsatna leh kal zel dan turte an sawi ho a ni.
JNV hi Central School, thingtlanga chhungkaw harsa zawk ten an fate man tlawm te-a zirna thaa an kal tir theihna tura sawrkar laipui hmalakna a ni a. Serchhip District chhungah Thenzawl hmuna zirna in tha tak JNV School kan nei chu kan vanneihzia hria a, naupang a tam thei ang ber luh kan tum tur a ni, DC chuan a ti.
Enrollment a hma an sawn zel theih nan JNV Selection test – pawl 6 atan bik special JNVST hi July ni 26, 2025 hian neih tur a ni a. Thenzawl pawn lama awmte tan an kalna tur ngaihtuah sak an ni ang. Quotation chungchangah harsatna te sawiho a ni a, dan angin advertisement chhuah thin ni mahse, quotation thehlut an awm loh thin avangin harsatna an tawk tih meeting-ah hian sawilan a ni bawk.
School cheithatna tur leh bungraw chhia siamthatna tur rawtna te chu pawm a ni a. JNV a daily wage a thawk tur mi 16 lak remtih a ni a. Electric audit neih a tul thin avangin hmalak dan tur sawiho a ni a. Thenzawl Ayush Hospital atangin naupangte hriselna endiktu tur doctor an kal thin avangin lawmthu an sawi a, a tul anga chhunzawm zel turin an ngen nghal bawk a ni.
Vawin meeting-ah hian Additional DC Pu Lalrinzuala bakah Thenzawl JNV School thuneitute an tel a ni..

Pr No. 228/2025 (SCP) Dated Serchhip 18th July, 2025
Issued by District Information and Public Relations Officer; Serchhip District, Serchhip.