Press Release Dated Serchhip, the 18th August, 2025

Serchhip District chhunga kawngpui chhia thawmthat dan tur rel

Dated Serchhip, the 18th August, 2025: Ruahsur nasa leh leiminin a tihchhiat Serchhip District chhunga National Highway siamthat dan tur vawiin khan DC Pu Paul L Khuma hovin thuneituten an rel a. He thutkhawm pawimawh hi Serchhip DC Meeting Hall ah neih niin, NHIDCL hnuaia contractor te an tel a ni.
Serchhip District chhunga kawngpui pawimawh National Highway enkawltu NHIDCL hnuaia contractor te hi hlawm (package) thumah then niin hlawm tinte hian kawngpui enkawl bik an nei theuh a. He NH-02 laitu contractor te hian kawngpui an siam zawh tawh hnuah kum 5 chhung an vil zui dawn a, kumin atang hian an vil hun tur Defect Liability Period hi a intan ta a. Vawiin meeting-ah hian heng contractor ten kawng chhia an thawm that dan tur ruahmanna DC hnena an thehluh chu thuneitute nen an sawiho a ni.
Serchhip DC Office atangin NH Team te fehchhuakin kawng chhe lai zawng zawng an fang chhuak a, thla an la vek bawk a. Chung kawngchhiate chu a rang lama siam leh thawmthat nghal a ngaih avangin vawiin hian contractor te sawi puiin Serchhip DC Office chuan hna an thawh dan tur hun bithliah an siam sak a ni.
Package 1 enkawltu contractor te hian October kar thumna ral hmain an kawng enkawlte blacktop hna thawh zawh hman an tum a. Kawng khuar lai hnawh khah hna hi tun kar chhung hian zawh hman an tum a ni.
Package 2 enkawltu contractor te chuan an kawng enkawl china khuar thuk leh chhe zual hnawhkhah hna chu tun karah thawh zawh an tum a. Ruah a la sur chhunzawm zel avangin kawng khuar lian vak lo awm belh zel siamthat hna chu chawl lovin an thawh reng tur thu an sawi bawk. Baktawng leh Serchhip inkar kawngpui hi November 15 ah zawh hman tum a ni a. Retaining Wall chim hi October ni 15 ah siam zawh hman an tum a. November 15 atanga December 1 chhungin Sailiam atanga Keitum black topping zawhfel an tum bawk a ni. An tum anga a hun taka an zo fel thei a nih chuan Serchhip By-pass a leimin nasat berna hmun khawih chhunzawm nghal an tum dawn a, hei hi January thla chhunga zawh hman an inbeisei bawk a ni.
Serchhip DC chuan khawtlang hruaitute leh mipui mimirte hnenah ngenna siamin NHIDCL Contractor ten kawng siamthat dan tur hun bithliah hi an zawm tha tawk em tih lo vilpui tur leh lo endik thin turin a chah a ni.

Pr. No. 269/2025 (SCP) Dated Serchhip 18th August, 2025
Issued by District Information and Public Relations Officer; Serchhip District, Serchhip.