Press Release Dated Serchhip, the 16th June, 2025

Tourist te hipna tur thawnthu insawisiak buatsaih dawn

Dated Serchhip, the 16th June, 2025: Vawiin khan Serchhip DC Pu Paul L Khuma hoin Serchhip Pisapui meeting hall-ah khualzin te hipna hmanrua a hman tur Serchhip District chhunga hmun mawi kan neih te hmanga thawnthu insawisiak buatsaih dan tur rel a ni.
Mizoram Tourism Department chuan August 8, 2025 hian “NARRATING MIZORAM : TALES OF OUR LAND (A story telling competition)” tih inelna a buatsaih dawn a. Hei hi District hrang hrang aiawhte inelna a ni dawn a. Serchhip District aiawhtu thlanna tur inelna buatsaih dan tur vawiin hian meeting chuan a rel a ni.
Inelna hi Serchhip District level-ah chhawng hnihin buatsaih ni se tiin meeting chuan a rel a. A chhawng khatnaah Serchhip Sub Headquarters YMA bultumin YMA branch hrang hrang te inelna chu July 15 ral hmain buatsaih ni se, a ti tha zual 10 thlang chhuakin a chhawng hnihnaah District aiawhtu tur DC hoin thlanchhuah ni se tiin an rel.
District Level inelnaah hian lawmman buatsaih a nih dawn bakah State level ah hian lawmman pakhatna atanga pathumna siam a ni dawn a. Serchhip District ah hian heng a hnuaia thupui tarlan zinga 5 thlang chhuakin Mizo culture nena inhmeh, khualzin mi te hip theihna tur thawnthu awmsa leh a hmunhma nawmna sawi chhuak thei tura inel a ni ang.
1. Tawi Tlang
2. Tawi Puk
3. Chhuanthar Baktawng
4. Khawbel
5. Khuai Kham
6. Ngentiang Puk
7. East Lungdar Tlang
8. Tuichang River
9. North Vanlaiphai
10. Paragliding Site- Zawlpui
11. Thenzawl
Vawiin meeting ah hian YMA, MUP, MHIP, MJA aiawhte bakah District thuneitute an tel a ni.

Pr No. 197/2025 (SCP) Dated Serchhip 16th June, 2025
Issued by District Information and Public Relations Officer; Serchhip District, Serchhip.