Press Release (Dated Serchhip, the 15th July, 2025)

New Serchhip area ah bawlhhlawh thliar hrang tan dawn

Dated Serchhip, the 15th July, 2025: Serchhip khawpuiah bawlhhlawh thliar hran leh sawngbawl chu a taka kalpui tan tum a lo ni ta a. A bul tanna (pilot) atan New Serchhip thlanchhuah a nih avangin vawiin khan Serchhip DC Pu Paul L Khuma hoin New Serchhip area-a Village Council leh tlawmngai pawl zawng zawngte koh khawm an ni.
Pu Paul L Khuma chuan bawlhhlawh sawngbawl kawngah Serchhipin bung thar a kai dawn a, chumi tihhlawhtlinna tur chuan a bul tan nan New Serchhip thlan an ni, a ti. DC chuan mi tlemte rorel, mipuia barh tumna ni loin, huam zau taka inrawnkhawma, he hmalakna hi kalpui tum a nih avangin New Serchhip area-a VC member zawng zawng te leh tlawmngai pawl awm apiang te, an zavaia koh khawm an ni, tih a sawi a. Bawlhhlawh sawngbawl kawnga hmalak an tum dan hi mipuiah chiang taka hrilhfiah a, inhriatthiam lohna leh dodalna te a awm lohna tura zirtirna tha pe turin kalkhawmte a ngen a. Mipuite tel loin he hmalakna hi engti kawng zawng maha a hlawhtlin theih loh avangin, thawhhona tha tak nen, mi dangte tan pawha entawntlak tura he hmalakna hi tihhlawhtling turin Pu Paul L Khuma chuan New Serchhip mipuite a ngen a ni.
Serchhip District thuneitute kaihhruaiin Serchhip District Urban Development Office, Public Health Engineering Department (PHED) leh Greenherd Pvt. Ltd. te chuan bawlhhawlh sawngbawlna a takin Serchhipah kalpui tan an tum a. He hmalakna hian Serchhip khawpui pumpui a huam dawn a. A bul tanna atan New Serchhip thlan chhuah niin August thla tir atangin New Serchhip huam chhunga chengten anmahni in theuhah an bawlhhlawhte an thliar hran a ngai tawh dawn a ni.
Vawiin meeting-ah hian Addl DC Pu Lalrinzuala, DUDO Pu Gaston Vanlalhriatpuia, New Serchhip North leh South VC, YMA, MHIP leh MUP hruaitute an tel a ni.

Pr No. 222/2025 (SCP) Dated Serchhip 15th July, 2025
Issued by District Information and Public Relations Officer; Serchhip District, Serchhip.