Press Release Dated Serchhip, the 15th January, 2025

Serchhipah Earthquake Mock Exercise neih a ni

Dated Serchhip, the 15th January, 2025: Vawiin khan Serchhip DC Pu Paul L Khuma kaihhruaina hnuaiah Serchhipah Earthquake Mock Exercise hlawhtling taka neih a ni.
National Disaster Management Authority (NDMA), Mizoram State Disaster Management Authority (MZSDMA) leh District Disaster Management Authority te tangkawp chuan Mizoram chhung hmun hrang hrangah lirnghing a lo thlen thulha chetlak dan tur Earthquake Mock Exercise hi vawiin chhun leh zanah an kalpui a. Serchhip District ah chuan chhunah Serchhip Bazar leh Serchhip Government Higher Secondary School ah te an kalpui a ni.
Chawhma dar 10 ah Serchhip DC Pisapui atangin siren tih rik a ni a. Serchhip Bazar atang leh Serchhip Govt Higher Secondary School atangin Responsible Officer – Serchhip DC hnenah chhiatna thlen thu report pek nghal a ni a. RO hian Incident Commander atan Additional DC Pu Lalrinzuala chu ruat nghalin Leisekawt Field ah Staging Area, Serchhip Indoor Stadium-ah Relief Camp siam a ni a. District Emergency Operation Centre ah IRS te pungkhawmin mahni panna lamtur rang takin an pan nghal a ni.
Mizoramah lirnghing Magnitude 7.1 a na chu 10:03 ah a nghing a. Hei hian Serchhip khawpui chhunga Bazar Building tichhiain mi 2 an thi a, hliam tuar 24 awmin an zinga 4 te chu na takin an hliam a, Bazar building kailawn a chhiat avangin Quick Response Team ten hliam tuar leh thi te hi hruihruala inkhai chungin an la thla a. Morgue Van leh Ambulance in thi leh hliam te hi phurin Serchhip Damdawi in panpui an ni a. Hliam na vak lo tuar te erawh a hmunah doctor leh nurse ten first aid an pe a ni.
Chhiatna thlenna hmun pakhat zawk Serchhip Govt Higher Secondary School ah hian Science Laboratory building a chim a. Building chima tang school naupang 15 chhanchhuah an ni a. Building chimin a vuak chhiat electric current tek chuan kangmei a tichhuak bawk a. Fire Tender hmanga thelh mih a ni.
Khawthim hnua chhiatna a thlena chet lak dan tur zir nan vawiin tlai dar 4:40 atanga zan dar 7 chhungin Serchhip P&E Venga Pu Malsawmtluanga In chim mock exercise neih zui a ni ang.
Vawiin mock exercise ah hian Serchhip Quick Response team, Aapda Mitra, Government Serchhip College Youth Advencture Club, Serchhip Sub-Headquarters YMA, Village Disaster Management Committee (VDMC), Assam Rifles, Serchhip Police, Serchhip District Hospital leh department hrang hrang hotute an chechhuak a ni.

Pr. No. 11/2026 (SCP) Dated Serchhip 15th January, 2026
Issued by District Information and Public Relations Officer; Serchhip District, Serchhip.