Press Release Dated Serchhip, the 15th August, 2025

FCS&CA leh LR&S changtu Minister Pu B Lalchhanzova’n Serchhipah chanchinbumite a kawm

Dated Serchhip, the 15th August, 2025: Independence Day 2025 hmanga Serchhipa lo kal Supply leh Revenue changtu Minister Pu B Lalchhanzova leh amah tawiawmtu Revenue Secretary Pu Vanlalmawia leh Supply Secretary Pi Teresy Vanlalhruaii ten Serchhip DC Meeting Hall-ah vawiin chawhnu khan chanchinbumite an kawm.
Minister Pu B Lalchhanzova chuan a chawrchhuahna District ngeiah Independence Day a hmang thei chu hlu a tihzia sawiin hemi hun hi remchangah hmangin Serchhip District hmasawnna tur ngaihtuah a, thil tangkai tih theih beseiin Revenue leh Supply hotulu te nen an kal a ni, tih a sawi a. LR&S leh FCS&CA Department ten Serchhip District leh Mizoram pumpui tana an hmachhawp te puanzarna leh inrawnkhawmna hun remchang atan he hun hi an hmang tih Pu B Lalchhanzova chuan a sawi bawk.
Pu Vanlalmawia chuan Mizorama Revenue inrelbawl dan chungchang a bul thum atanga a fel loh avangin, hmasawn zel turin insiamrem leh tihdanglam tur a tamzia a sawi a; hma lam pan tur hian a bulah kan let a ngai ta zawk a ni, a ti. Mipui hnaiha revenue hotute an awm theih nan thingtlang khaw lian deuhah Village Revenue Official dah an tum thu te, Sub Division ah Assistant Commissioner ruat an tum thu te sawiin a bul tan nan Thenzawl leh Vairengte a dah phawt an tum tih a sawi a. DC te hi revenue thuneitu sang an nih avangin an thuneihna tihpun an tum dan a sawi a, Mizoram Revenue Amendment Act Assembly a pass tura thehluh a nih thu a sawi bawk. Technology hman tangkai an tum dan leh hma an lak mek dan te, chhiah (tax) pawh e-ram hmangin online a pek theih a nih thu te, digital land record an kalpui mekah GIS Mapping tih niin online in mahni ram chin chiang taka en theih a nih thuai tur thute a sawi. Secretary chuan Revenue Court System mumal awm lo pawh siam that tumin hma an la a, Revenue Court Manual siam mek a ni, a ti a. Ram buai chungchangah DC leh ADC te chu first appellate atan ruat an tum thu te a sawi bawk.
Supply chungchanga an hmachhawp sawiin Pi Teresy Vanlalhruaii chuan ruahmanna fel tak siama mipuiin an nitin mamawh a hun tak leh dik taka an dawn theih nan hma an lak thu a sawi a. Retailer te hnenah buk dik taka buhfai leh a dangte an pe chhuak ngei tih hriat nan Supply Kudam tinah digital weighing scale dah a ni dawn a, August thla chhung hian khawl a lo thlen kim beisei a ni, a ti. Sawrkar laipui duh dan angin Beneficiary zawng zawngte e-kyc tih fel vek tur a ni tih Supply Secretary chuan sawiin khaw tina VC te tanpui turin a sawm a; September 30 thleng chauh hun an neih tawh avang leh e-kyc tifel lo ten ration an dawn theih dawn loh avangin tan la turin a ngen a ni. Online-a ration card dilna siam an tum thu te, mipuiin thla tira ration an dawn theihna tura tan an lak dan te, Supply Minister hmalakna avanga kawng chhe karah pawh buhfai harsat thu hriat tur a awm loh thu te Pi Teresy Vanlalhruaii chuan a sawi bawk a ni. Hei bakah hian FCS&CA Secretary chuan ration chungchang a ni emaw, an department kaihhnawih engpawh harsatna emaw, zawh duh emaw mipuiin an nei a nih chuan Toll free No. 1976 ah englai pawha biak pawh theih an nih thu a sawi a ni.
Press Meet ah hian Serchhip DC Pu Paul L Khuma leh Serchhip SP Pu Gavit Gogna te, LR&S Director Pu R Lalthazuala bakah official dangte an tel a ni.

Pr. No. 266/2025 (SCP) Dated Serchhip 15th August, 2025
Issued by District Information and Public Relations Officer; Serchhip District, Serchhip.