Press Release Dated Serchhip, the 13th June, 2025

Serchhip DC-in District MPF seminar a hman pui

Dated Serchhip, the 13th June, 2025: Vawiin khan Serchhip Kawnpui Presbyterian Kohhran Diamond Jubilee Hall-ah Mizoram People Forum, Serchhip District bultumin Sawrkar Tha (Good Governance) chungchang Seminar buatsaih a ni a. Serchhip Bawrhsap Pu Paul L Khuma chu khuallian a ni.
Serchhip Bawrhsap Pu Paul L Khuma chuan chuan ‘Good Governance’ chungchang zirho chu a phur thu leh he hun a hmanpui thei chu lawmawm a tih thu a sawi a. Good Governance chu inrelbawlna tha tihna mai niin chumi nei tur chuan harsatna tam tak paltlang ngai erawh a awm thu leh mamawh hrang hrang kan neih thu a sawi. DC chuan sawrkar hna tha lehzuala thawk thei turin Digital Transformation kalpui chhoh mek a ni a, inrelbawlna tha leh felfai zawk a awm theih nan Mobile App thar pawh peihfel tep a ni, a ti a. Mipuite chu Right to Public Information Act te pawh hre thar a hmang tangkai tur te, Good Governance nei tura kan beih hram hram a tul thute a sawi bakah Good Governance a awm theih nana dan leh thupek kenkawh chungchang, Sawrkar hnathawk leh mipui te hriattur pawimawh hrang hrangte a sawi a ni.
Rev Lalramliana Pachuau, General Secretary, MPF General Headquarters hoin ‘Good Governance’ chungchang zirhona neih chhunzawm nghal a ni a. Thupui thlan bikte hmanga paper buatsaih uluk taka zirho niin, sawihona hun hman a ni bawk.
Mizoram People Forum, Serchhip District bultuma Sawrkar Tha (Good Governance) chungchang Seminar buatsaihah hian Serchhip District chhung khaw hrang hranga Village Council Member 2 theuh leh District chhung veng leh khaw tina MPF Local Forum aiawhte bakah District MPF aiawhte an tel a. He hun hi Rev Zairemmawia, President, MPF Serchhip District chuan kaihruaiin, Vice President Rev Lalremruata chuan lawmthu sawiin hun a khar a ni.

Pr No. 195/2025 (SCP) Dated Serchhip 13th June, 2025
Issued by District Information and Public Relations Officer; Serchhip District, Serchhip.