Press Release (Dated Serchhip, the 11th July, 2025)

Serchhipah District Fire Prevention Committee thukhawm

Dated Serchhip, the 11th July, 2025: Vawiin khan Serchhip District Fire Prevention Committee chu DC Meeting room ah an chairman Serchhip DC Pu Paul L. Khuma hovin an thukhawm a, kum kal meka an hmalakna an thlirlet.
DC chuan kangmei ven kawngah Sub Headquarters YMA hmalakna chu fakawm a tih thu a sawi a. Tha zawka ram kang kan ven theih nan thil tisualtute zawnchhuah kawngahte kan theih anga thuneitute kan thawhpui a tul a, DC office in Vantlangviltu app a siamte pawh hman tangkai theih a nih thu a sawi a ni.
Member Secretary Pu R. Lalnungrenga DFO Thenzawl chuan state level a kangmei vengtha ah Serchhip district chu a ti tha 2 na kan nih thu a sawi a. Kum tinin March 15 hmaa lo hal tura hriattirna chhuah thin chuan zawm a hlawh tha a, a hnu lamah lo hal an awm tawh lo nia an hriat thu a sawi. Kum tina kang mei chhuah fo thinna hmunte pawh kum dang aia uluk zawka ven dan tur chungchang sawiin, khaw tina VCP te kaihhruaina in Village Forest Fire Prevention Committee pawh tha taka din nise tih a ni bawk.
He hunah hian SP Pu Gavit Gogna, Addl DC Pu Lalrinzuala, SDO (S) Pi Rebecca Laldinmawii Hrahsel te bakah department hrang hrang aiawhte, khawtlang hruaitute an tel a ni.

Pr No. 216/2025 (SCP) Dated Serchhip 11th July, 2025
Issued by District Information and Public Relations Officer; Serchhip District, Serchhip.