Press Release Dated Serchhip, the 11th February, 2026

Serchhip DC Pu Paul L Khuma’n Fire Prevention Week a hawng

Dated Serchhip, the 11th February, 2026: Kangmei ven kawnga beihpui thlakna Hapta, Fire Prevention Week chu vawiin khan Serchhip DC Pisapui Hall-a programme buatsaihah DC Pu Paul L Khuma’n a hawng.

Pu Paul L Khuma chuan mei chu a awmna tura a awm a, a hmanna tura hman a nih chuan a thain a tangkai em em a; amaherawhchu, a kan lohna hmun tura mei a kan chuan engmah thliar loin a hmaa awm a tichimit thin a. Chuvangin, mei laka kan fimkhur a, kangmei a chhuah lohna tura inzirtir a pawimawh em em a ni, a ti. Kangmei ven kawnga hmalakna hi sawrkar official te ta bik ni loin kan zavaia mawhphurhna a ni tih hriain thawhhopuiah DC chuan Serchhip District mipuite a sawm a ni.

Thenzawl DFO leh District Fire Prevention Committee-a Member Secretary ni bawk Dr R Lalnungrenga chuan mei kawng sial pawimawhzia a sawi a. Mizote chu lo vata hal leh thin kan nih avangin, ram a kan lohna turin mei kawng zau taka sial hi kan tih ngei ngei tur a ni, a ti. DFO hian ramngaw leh ramkang chungchanga Mizoram leh Serchhip District dinhmun tlangpuite leh kumina Fire Prevention Week a hmalak dan tur Committee in a ruahman te a sawi a ni.

Ram kang venhim kawnga nikum lama titha thlanchhuahte lawmman DC hian a sem nghal a. Pakhatna Leng, pahnihna Zote South leh parhumna Ngentiang te niin, cheng 5000 theuh hlan an ni.

Fire Prevention Week 2026 hi Mizoram pumah February 9 atanga February 13 chhung hman a ni dawn a. Kumin thupui hi “Nungchate chenna leh tui thianghlim min petu ramngaw, kangmei lakah venghim rawh” tih a ni.

Vawiin programme hi Honorary Wildlife Warden Pu C Lalhminghlua’n a kaihruai a. Serchhip District Joint VC Chairman Pu B Vanlalsawma kaihhruaina hnuaiah Fire Prevention Week pualin kan ram duat taka enkawl leh venghim tur te, midangte zirtir chhawng zel tur tein kalkhawm ten thu an tiam a ni.

Serchhip District SP Pu Gavit Gogna, District Fire Prevention Committee Member te, District chhunga Officer te, tlawmngai pawl hrang hrang leh chanchinbumi te, College zirlai naupang te leh sawm bik midangte an tel a. N Vanlaiphai DFO Pu Thanliana Hauhnar chuan lawmthu sawiin hun a khar a ni.

Pr. No. 45/2026 (SCP) Dated Serchhip 11th February, 2026
Issued by District Information and Public Relations Officer; Serchhip District, Serchhip.