Press Release (Dated 9th Aug 2024)

Serchhip District-a bawlhhlawh sawngbawl dan tur sawiho

Dated Serchhip, the 9th August, 2024: Vawiin khan Serchhip DC Pu Paul L.Khuma hoin Town Sanitation Task Force te chu Serchhip DC Meeting Hall-ah an thukhawm a, Serchhip khawpui a lo fai zawkna tura bawlhhlawh sawngbawl dan tur ruahmanna an sawi ho a ni.

Meeting ah hian Solid Waste Management Bye-Laws, 2018 hman chungchang sawiho a ni a. He dan hi Aizawl leh District khawpui hmun thenkhatah hman mek a ni tawh a. Serchhip District ah pawh he dan hman a nih ve theihna turin kum 2020 khan hma lak tan a ni a, meeting te neih niin he dan hman tanna tur notification te pawh DC chuan hemi kum hian a lo tichhuak tawh a ni. Vawiin meeting-ah hian Solid Waste Management Bye-Laws, 2018 hi Serchhipa hman tan a nih theih nan a thuphunga pawm a ni a. He dan hnuaiah hian bawlhhlawh tawih thei leh thei lo thliar hran dan te; chenna in, office, school leh sumdawnna hmuna bawlhhlawh khawnna rate te; mipui mimirte leh chhungkaw tin mawhphurhna chipchiar a awm avangin mipuiah zau zawka inzirtir ni se, an ti a ni.

Green Herd SP Pvt. Ltd chuan plastic bawlhhlawh sawngbawlna hmun Plastic Waste Management Centre, Thenzawla an din tur chungchang member te hmaah an sawifiah a. PHE Department te nena thawkhoin plastic bawlhhlawh lakkhawm te chu he an Centre hian an buaipui dawn a. Serchhip khawpuiah hian VC te chhawk zangkhai a, sum leh paiah mipui phur tihrit belh chuang si loin Bawlhhlawh tawih theih lo khawn an inhuam thu te, bawlhhlawh phur motor in a thlen phak loh hmunah mihring ruaia an kawtkai atanga bawlhhlawh lakkhawm sak te thlenga an inhuam thu an sawi a. Town Sanitation Task Force chuan an rawtna te chu tha tiin UD&PA Department te nen lo sawiho se, thawhho theih dan kawng a awm em tih te lo zir chiang se se tiin an rel a ni.

Meeting ah hian Additional DC Pu Lalrinzuala hnen atangin District Solid Waste Management Plan ngaihthlak a ni a. Serchhip District chhung khaw hrang hrangah kan bawlhhlawh te mumal taka sawngbawl a nih theihna tura District Administration in ruahmanna leh hmathlir an neih te a chhawpchhuak a. Mizoram District te zingah District fai leh thianghlim ber kan nih theihna tura tan lak an tum dan a sawi a ni.

Vawiin Town Sanitation Task Force meeting ah hian member te bakah Serchhip khawpui chhung veng tin VCP te leh an aiawh te an tel a ni.

Pr No. 155/2024 (SCP) Dated Serchhip 9th August, 2024
Issued by District Information and Public Relations Officer; Serchhip District, Serchhip.