Press Release (Dated 8th November 2024)

PM Vishwakarma hmalaknaah Serchhip District-in hma hruai; training chhuak mi 61 hnenah Certificate hlan

Dated Serchhip, the 7th November, 2024: Vawiin khan Serchhip DC Pisapui Hall ah PM Vishwakarma hnuaia hmalakna peng pawimawh tak pakhat – thing mistiri (carpentry) training chhuak mi 61 hnenah Certificate hlan a ni a. He hunah hian DC Pu Paul L.Khuma chu khuallian a ni.
        DC chuan Mizoram District 11 zingah training chhuak te hnena certificate sem thei hmasa ber an ni chu Serchhip District mipuite, DC Office a thawktute leh Serchhip District a he scheme kalpuitu Medhavi Foundation te thahnemngaihna vang a ni, a ti a, tun dinhmunah District te zinga hmahruaitu kan ni thei chu a lawmawmin a chhuanawm tak zet a ni, a ti. PM Vishwakarma hi mipui nawlpui thleng phak hmalakna a ni a, theihtawp kan chhuah chuan min chawi kangtu a ni thei a ni, DC Pu Paul L.Khuma chuan a ti a. Vawiina thing mistiri training chhuak certificate dawngtute fuihin a bul an tan mek chauh tih hria a, tan la chhunzawm zel turin a chah a. Hlawhtling turin anmahniah sawrkarin beiseina sang tak a nei tih sawiin, an beisei leh hmathlir te a tak thlenpui ngei turin training chhuak te leh PM Vishwakarma kaltlanga hamthatna dawngtute a fuih a ni.
        Serchhip District a PM Vishwakarma hmalakna chungchang sawi zautu Dr C.Vanlalchhanhimi, Sub Deputy Commissioner chuan Serchhip District chhung VC zawng zawng te he scheme hnuaia an inziahluh tawh thu te, dilna thehluttu mi 2582 awm tawhin District 11 zingah hma an hruai mek thu a sawi a. Dilna lut te hi Nodal Department – Commerce and Industries chuan lo thlifimin DC Office in a pawmpui hnuah state ah thehluh leh thin a ni, a ti.
        Carpentry training hi batch 2 a kalpui a ni a. Training chhuak mi 61 zingah hian hmeichhia pakhat a tel a ni.
        PM Vishwakarma hnuaiah hian trade 18 a awm a. Kutthemthiam te thiamna belhchhah a, an theihna tipunsakin, quality tha zawk an siam theihna tura tanpui chu a thiltum a ni a. Vawiina training chhuak mi 61 te hian hmanrua leina tur cheng 15,000 an dawng theuh dawn a. Hei bakah hian 5% a pung, dahkham awm lo loan, cheng nuai 3 thleng an dil thei a ni.
        Vawiin programme hi Pi Lalbiakdiki Ralte, Centre Coordinator, Medhavi Foundation chuan a kaihhruai a. Training chhuakte aiawhin mi pahnihin thu an sawi a. Khawtlang hruaitu VC te leh official te programme ah hian an tel a. Medhavi Foundation State Head Pu T.Vanlalkima’n lawmthu sawiin hun hnung a khar a ni.

Pr No. 248/2024 (SCP) Dated Serchhip 7th November, 2024
Issued by District Information and Public Relations Officer; Serchhip District, Serchhip.