Press Release Dated 6th February, 2025

Serchhip DC hoin Fire Prevention Week hman dan tur rel
Dated Serchhip, the 6th February, 2025: Vawiin khan District Level Committee on Fire Prevention chu Serchhip DC meeting Hall-ah an Chairman Pu Paul L Khuma, Serchhip DC hoin an thukawm a. Fire Prevention Week 2025 hman dan tur an rel.
State Level Committee on Fire Prevention, 2025 thutkhawma an lo rel tawh angin Fire Prevention Week chu February ni 10 atanga 15 chhung neih tur a ni a. Serchhip District-ah a hawnna inkhawm chu February ni 10, chawhma dar 11ah neih ni se, DC Pu Paul L.Khuma chu he hunah hian khuallian ni se tiin an rel a ni.
March ni 15 ral hmaa lo hal vek tura state level committee-in a lo rel tawh te leh, meikawng sial tura hriattirna te, ramhnuaia meichhem apiang timit zel tura hriattirna te chu chak taka bawhzui ni se, tiin meeting chuan a rel a. Serchhip District chhunga kangmei chhuah tamna ram te zirchian ni se, a huamchhung VC te hnenah ngenna siam a, vil uluk lehzual tura hriattir ni se, an ti a. Ram kal apiangte hming ziak tura ngen ni se, an ti bawk.
Fire Prevention chungchanga awareness campaign chu awmze nei zawka neih a nih theih nan DFO te leh Forest RO te chuan forest division leh range tinah ruahmanna action plan mumal taka siamin District Administration ah thehlut tura beisei an ni a. Print media leh social media hmangin inzirtirna hi kalpui a nih dawn bakah school, college, kohhran leh YMA ah te a tam thei ang ber puanzar a ni bawk ang.
Serchhip District chhunga kangmei ven kawnga hma la tha khuate hnenah lawmman siam a ni leh dawn a. A endik turin Forest Department lamin Sub Headquarters YMA te an thawhpui dawn a ni.
Vawiina thutkhawmnaah hian Environment Forests and Climate Change Department hotute, sawrkar official dang te leh tlawmngai pawl te an tel a ni.

Pr No. 45/202 (SCP) Dated Serchhip 6th February, 2025
Issued by District Information and Public Relations Officer; Serchhip District, Serchhip.