Press Release Dated 5th December, 2025
Serchhipah Krismas leh Kumthar vuakveta mipui himna tur ngaihtuah
Dated Serchhip, the 5th December, 2025: Krismas leh Kumthar hunpui a lo hnaih tak avangin, Serchhip District chhungah mipuiten him leh thlamuang taka hun an hman theih nan vawiin khan Serchhip DC Pu Paul L Khuma hoin Serchhip DC Meeting Hall-ah thuneitute an thukhawm.
Serchhip DC Pu Paul L Khuma chuan Krismas leh Kumthar hunpuiah mihring rilru a sahawk a, pawisawi lo vanduaina leh thil thalo a thlen theih avangin mipui himna tur leh, pawikhawihna a thlen loh nan engtia hmalak tur nge, tih ngaihtuah a tul thu a sawi a. He hunah hian khawtlang hruaitute, YMA te leh sawrkar tanhona a pawimawhzia sawiin Dan bawhchhiatna a thleng a nih chuan, thuneitute hnena thlen thin turin mipuite a sawm a. Heng thil hi ‘thenawmte hekna’ ni loin, pawi lian zawk a thlen lohna tura a hun taka report hi khua leh tui tha nihna a ni zawk, DC chuan a ti.
Additional SP Pu H Lalduata chuan an inbuatsaihna te sawiin ngawrh taka an duty tur thu leh, Beat Post siam belh leh help desk hun an tum thu a sawi a. Khawtlang hruaitute nena tanghoa hma an lak tur thu a sawi bawk.
Krismas leh Kumthar vuakvetah hian magistrate duty te, police duty te, Excise Department te leh YMA ten khawlai an fang thin dawn a. Thil duhawmlo thleng a awm palha, rang taka koh theih tur Police Quick Response Team siam a ni dawn a. Khawtlang hruaitute leh Police tanghoin duty an neih mek pawh chhunzawm zel ni se, tiin meeting chuana rel.
Helmet khum loa lirthei ke pahnih nei khalh te leh kum tling loa lirthei khalh chungchang pawh sawilan a ni a. Kum tlinglo lirthei khalh chu Section 4 read with Section 180 MV Act angin Rs.5000/- chawitira hrem theih a nih bakah Section 199 A MV Act angin motor neitu emaw a nu leh pa emaw Rs.25000/- fine a hrem tel theih a ni. Proton vuah, 2 Wheeler ring taka khalh thin te pawh dan anga hrem theih an ni a. Traffic Police te chuan Vahan kaltlangin lirthei number hmangin heng dan bawhchhetute hi an umzui dawn a ni.
Vawiin meeting ah hian Police, Excise, I&PR, DC Office a officer te, Joint VC aiawh te leh tlawmngai pawl hrang hrang aiawhte an tel a ni.
Pr. No. 387/2025 (SCP) Dated Serchhip 5th December, 2025
Issued by District Information and Public Relations Officer; Serchhip District, Serchhip.
