Press Release (Dated 2nd Aug 2024)

ASF hrileng vangin Serchhip DC in inkhuahkhirhna thupek a tichhuak

Dated Serchhip, the 2nd August, 2024: Mizoram chhung District hrang hrangah vawk hri, African Swine Fever (ASF) avangin vawk tam tak thi tawhin engemawzat suat an ni tawh a. Serchhip District chhung khaw engemaw zat chu vawk hri lenna hmun, Infected Area ah puan an ni tawh bawk. Kan lo fimkhur nan leh hri leng zel tur ven nan vawk chungchangah inkhuahkhirhna tihchhuah a tul a.

Pu Paul L Khuma, MCS, Serchhip District Magistrate chuan Section 163 of Bharatiya Nagarik Suraksha Sanhita, 2023 tlawh chhanin a hnuaia thupek hi a tichhuak.

1. Infected Area a puan khua te atangin vawk leh vawk sa lakluh leh lakchhuah khap tlat a ni a, vawk talh leh a sa zawrh pawh khap tlat a ni.

2. Serchhip District chhungah ram dang (Foreign countries), State dang leh Mizoram chhung District dang atangin Vawk, Vawksa leh Vawksa atanga siam eitur reng reng lakluh khap tlat a ni.

3. Serchhip District chhung khua leh khua emaw veng leh veng emaw-a vawk inlakpawh khap tlat a ni.

4. Vawk hrisel tha chauh talh tur a ni a. Vawk damlo reng reng talh tura sawngbawl loh tur a ni.

5. Vawk damlo leh thi reng reng chu A.H & Vety. Department thawktu te hnenah hriattir vat tur a ni a. Vawk thi reng reng uluk takin Disinfectant nen thuk taka phumbo tur a ni. Vawk thi reng reng bawlhhlawh paihna hmunah leh lui remchangah paih loh tur a ni.

He thupek hian thu leh awm hma chu Order chhuah ni – July 31, 2024 atanga thla 2 (two months) chhung a huam ang.

He thupek zawm lo chu Section 223 of Bharatiya Nyaya Sanhita, 2023 dan hmangin hrem theih an ni ang.

Pr No. 148/2024 (SCP) Dated Serchhip 2nd August, 2024
Issued by District Information and Public Relations Officer; Serchhip District, Serchhip.