Press Release (Dated 25th Oct 2024)
Serchhip DC hovin khuarel chhiatna hmachhawn dan tur inbuatsaihna video conference hmangin chhim
Dated Serchhip, the 25th October, 2024: Vawiin khan Serchhip DC Pu Paul L.Khuma hovin DC Meeting Hall ah khuarel chhiatna a lo thlen thulha inbuatsaih dan tur “Orientation and Coordination Conference on State Level Mock Exercise on Flood and Landslide Disaster in Mizoram” chu video conference hmangin District Disaster Management Authority member ten an chhim.
Video Conference hmanga sawihona hun hi DM&R Secretary Pi K.Lalrinzuali’n a kaihruai a. Mizoram chhung District tinah chhiatna a lo thlen thulha inbuatsaih dan tur zirhona neih a nih tur thu te, nunchan zirna (mock exercise) hmun hrang hrangah liantham taka buatsaih a nih tur thu te ngaihthlak a ni a. Brig. Ravinder Gurung, Sr. Consultant, ME&IRS, NDMA, Govt. of India chuan mock drill leh table top exercise neih dan tur ruahmanna chipchiar sawifiahin District thuneitute leh DDMA member te, sawrkar department hrang hrang te leh mipui mimir te bakah khawtlang hruaitute tih tur leh mawhphurhna te a hrilhfiah a ni.
Video Conference neih zawh hnu hian DC Pu Paul L.Khuma hovin meeting neih chhunzawm nghal a ni a. “Exam khirh tak bei tur ten inbuatsaihna an kalpui angin khuarel chhiatna kan hmachhawn dan tur hi theihtawpa thaa kan inbuatsaih a nih chuan, harsa lutuk lovin kan paltlang thei dawn a ni”, DC chuan a ti a. “Chhiatna a lo thlen huna mahni mawhphurhna leh tih tur theuh sawrkar thuneitute leh mipuiin kan hriatlawk hi kan tih makmawh a ni a, hun tha kan neih lai hian uluk takin i inbuatsaih ang u”, tiin member te a sawm a ni.
Vawiin meeting ah hian department hrang hrang aiawh te bakah VCP (Village Disaster Management Committee Chairman) te leh tlawmngai pawl hrang hrang aiawh te an tel a. Disaster Managment Plan zulzuiin Serchhip District a Table Top Exercise leh Mock Drill neih dan tur ruahmanna siam niin mimal tin te mawhphurhna tur inhrilhriatna hun hman a nih leh tur thu ngaihthlak a ni bawk.
Pr No. 228/2024 (SCP) Dated Serchhip 25th October, 2024
Issued by District Information and Public Relations Officer; Serchhip District, Serchhip.
