Press Release Dated 20th February 2026

Serchhipah State Day of Prayer hman a ni

Dated Serchhip, the 20th February 2026 : Vawiin khan New Serchhip YMA Hall ah Mizoram State Day of Prayer, ram tana tawngtai ni chu Serchhip mipui ten an hmang.

Vawiin programme-a thusawitu Serchhip DC Pu Paul L Khuma, Patron, State Day of Prayer, Serchhip ni bawk chuan Mizoramin State puitling kan neih dan chanchin sawiin ram buai thim chhah paltlang a, state zalen kan lo neih dan te, chumi ni denchhena ram tana tawngtaina ni kan hman dan te a sawi a. Kan ram mawi leh boruak nuam tak te, inpumkhatna leh inunauna kan neih te, faina leh thianghlimna kawnga kan hmalakna te chu mi dangte entawntlak a nih laiin; a chhe lamah – drug leh zu ngawlveina te, HIV positive leh nupa inthen tam lutuk te hi kan vei a ngai tak zet a ni, a ti a. Serchhip District pum huap ruihhlo ngai camping neih zawh tak hlawhtlinna te sawiin DC Pu Paul L Khuma chuan camp chhuakte tan tihtakzeta tawngtai zel turin mipuite a sawm a. Kan ram leh kan hnam, kan fate tana bang loa tawngtai thin nu leh pa nih i tum theuh ang u, tiin kalkhawmte a sawm a ni.

Serchhip District State Day of Prayer Working Chairman Rev Laltanpuia Colney chuan programme a kaihruai a. Rev K Lalhmingmawia’n tawngtai thupui a hawng a. Thupui hrang hrang hmanga tawngtai rual a neih a nih hnuah Secretary Upa F Ramdinpuia’n lawmthu sawiin hun a khar a ni.

State Day of Prayer hi politics emaw eng party emaw hmalakna ni lovin pawl leh kohhran zawng zawng inthliarna awm loa ram pum huapa tawngtaina ni anga kalpui a ni a. Kum 2024 atanga hman tan niin kumin hi a tum 3na a ni a. Thupuiah “I din thar leh ang u” (Nehemia 2:17) tih chu ram pumah hman a ni.