Press Release (Dated 1st November 2024)

Serchhipah 100% LPG Home Delivery lawmna hun hmang

Dated Serchhip, the 1st November, 2024: Vawiin khan Serchhip District Consumer Association buatsaihin Serchhip Town chhunga 100% LPG Home Delivery kalpui anih lawman hun DC Pisapui Hall, Serchhipah neih a ni a, Food, Civil Supplies & Consumer Affairs Department Minister Pu B. Lalchhanzova’n khuallian niin a hmanpui.
Khuallian chuan thusawiin Aizawlah an kalpui hleihtheih loh LPG Home Delivery Serchhipa tha taka kalpui a ni thei hi a ropui hle a ni, a ti a,midang zirtirtu ni zel turin a chah. District Consumer Association tha tak a ding chu lawmawm a tih thu sawiin an hmalakna a fakawm tak zet a ni a ti. Ration card ennawn hna thawh mek a ni a, a buaipuitute lam atang chuan na deuh taka hma lak an tum thu sawiin, Ration card var in buhfai kg 1 cheng 30-a an leina tura a mawhphurtu ber chu anih thu a sawi bawk. Card pawl leh card enga awm awm tak, mahse a awm thei chin bitukin a pelh tawh si avanga leng ta lo eng emaw zat an lo la awm a; chuvang chuan mi nuai 1 te tan kg 1 cheng 20 a ration buhfai an khul theihna tur special ration package chu buatsaih a ni a, Ration Card sen an hman dawn thu a sawi a ni.
Kan vai hian kan ram tan rohlu tak kan ni theuh a ni tih hre thar ila, pawimawh ber bik a awm thei lova, kan vaia kan tanrualna hian kan district leh kan ramin hma a sawn zel theih nan kawng hrang hrangin tangkaina a nei a ni, a ti a. Kan thil tih zawng zawng hian a tum chu mipuite hmakhua a ni tih hi hria ila, tute emaw tal tan tangkai nih tum theuh ila, kan koa tla kan mawhphurhna te tha taka kan hlen theuh a tul a ni, a ti.
Kan vai hian bumna tawk thei vek kan ni a, chung hunah chuan consumer pawl chak tak kan mamawh a ni. Food, Civil Supplies & Consumer Affairs Department chuan consumer association hi kan thawhpui leh kan hmanraw pawimawh tak an ni a; sawrkarin tih dikloh a neih pawh min khalh ngil thuaitu tur an ni a, tha takin kan thawk ho zel dawn a ni, a ti bawk.
Serchhip District Consumer Association Secretary Pu Laldinpuia chuan report pe in SDCA ten eirawngbawlna gas buk dik taka mipuiin an lak theih nan hma an la thin a. Home Delivery hi gas buk dik leh tling tha mipuiin an dawn theihna tha a nih avangin Serchhip P&E veng atanga bul tan in, January ni 14, 2022 khan meeting hmasa ber neih a ni a, May ni 10, 2022 ah Home Delivery puitlingah puan a ni ta a; Serchhipa veng hrang hrang 17 ah delivery 100% kalpui alo ni thei ta hi lawmawm a tih thu a sawi a, hetiang hlawhtlinna an chan theih chhan chu Supply Department, Mizofed leh Legal Metrology Department te nen thawh hona zar a nih thu a sawi.
He hun hi Serchhip District Consumer Association Vice President Pu RL Chhuanawma’n a kaihruai a. Food, Civil Supplies & Consumer Affairs Department Director Pi Saizikpuii, Serchhip District Deputy Commissioner Pu Paul L. Khuma, Mizofed Chairman Pu Rothangpuia leh Mizofed Serchhip Manager Pu Vanlalsawma Vuangtu ten thu an sawi a. Serchhip District Consumer Association Finance Secretary Pu PC Vanlalnuna’n lawmthu sawiin hun a khar a ni.

Pr No. 233/2024 (SCP) Dated Serchhip 1st November, 2024
Issued by District Information and Public Relations Officer; Serchhip District, Serchhip.