Press Release (Dated 19th November 2024)
Chief Information Commissioner of India-in Serchhip District a tlawh
Dated Serchhip, the 19th November, 2024: Langtlang sawrkar neihna tur leh Right to Information (RTI) Act kalpui kawnga hmalakna peng pawimawh tak pakhat ni turin India ram Chief Information Commissioner of India Pu Heeralal Samariya chuan vawiin khan Serchhip District a tlawh. CIC chuan Serchhip District chhunga SPIO leh SAPIO zawng zawng te Serchhip DC Meeting Hall ah meeting pawimawh tak a neihpui a ni.
He meeting ah hian Serchhip District chhunga RTI kalpui dan thlirletna neih a ni a. Danin a phut anga RTI zawhnate a hun taka chhanna pek a nih theihna tura hma an lak dan te, harsatna an tawhte sutkian dan tur ngaihtuah a ni. CIC chuan sawrkar hnathawh danah langtlang taka thil tih a pawimawh thu leh mipuiten thil thleng engkim an hriat theihna tur dikna an neih thu te, chu an dikna chanvo an chan theihna tura SPIO leh SAPIO-te mawhphurhna pawimawhzia a sawi uar hle.
CIC chuan officer-te chu vantlang mipui zinga RTI zirtirna kawngah hma la uar turin a chah a. RTI chhanna tihkhawtlaia a awm loh nan sawrkar department hrang hrangte thawhhona leh inpawhna tha zawk neih a tul thu a sawi bawk. “Right to Information Act hi mipui sawrkar siamna hmanraw pawimawh tak a ni a, official-ten hei hi kan hriat a, dan leh inkaihhruaina uluk taka kan zawm a tul a ni,” CIC chuan a ti.
Mizoram Information Commission a CIC Pu John Neihlaia, IPS Rtd pawhin thusawiin mawhphurhna nei thuneihna hmangtu chuan a thil tihah mawh a phur ngam tur a ni, accountabilty leh transparency a awm chuan corruption a lo tlem dawn a ni, a ti. He dan tha tak hi hmanraw tha tak a ni a, hman a ngai a, hman loh chuan tangkaina a nei lo, a ti bawk. A hmang tangkaitu tur chu mipuite kan ni vek a ni. Mamawh nei an awm chuan thawktuten tha taka lo tih sakte pawh a tul a, hun tiam chhunga chhan ngei thin tur a nih thu a sawi a, Vcp te hi spio ah leh public authority ah a puang an nih thu a sawi bawk.
He hun hi MIC Secretary Pu Dolianbuaia, MCS chuan a kaihruai a. MIC Information Commissioner Pu Mangjangam Touthang, IIS Rtd chuan inlawmthu a sawi a. Zawhna leh chhanna hun hman niin, Serchhip DC Pu Paul L.Khuma’n lawmthusawiin hun a khar a ni.
Pr No. 261/2024 (SCP) Dated Serchhip 19th November, 2024
Issued by District Information and Public Relations Officer; Serchhip District, Serchhip.
