Press Release (Dated 19th Aug 2024)

Serchhip DC hoin ruihhlo do dan tur rel

Dated Serchhip, the 19th August, 2024: Sawrkar laipui Ministry of Social Justice and Empowerment hmalakna pawimawh tak pakhat thalai te zinga ruihtheihthil leh damdawi hmansual dona Nasha Mukt Bharat chungchang vawiin khan Serchhip DC Pu Paul L.Khuma hovin DC Meeting Hall-ah sawiho a ni.

DC chuan ruihhlo leh ruihtheihthil laka fihlim lo thlalai te chu tute nge an nih tih zirchian leh hriatchian a tul thu leh, heng miten an thiltih thalo an bansan theihna tura tanpui chu thil pawimawh hmasa nia a hriat thu meeting ah hian a sawi a. Serchhip District chhungah ruihhlo laka thalai te an fihlim theihna turin Nasha Mukt Bharat kengkawh tu tur zawng zawng – sawrkar department te, zirna in te leh tlawmngai pawl te chu tan la thar turin Pu Paul L.Khuma chuan a sawm a ni.

Vawiin meeting-ah hian Serchhip District chhunga hmalak dan tur ruahmanna – action plan siam ni se, action plan hi duan fel a nih hunah enho tura thutkhawm leh ni se tiin an rel a. Nasha Mukt Bharat Abhiyan-in inkaihhruaina a siam ang zul zuiin school leh college a campaign neih dan tur te, a zau thei ang bera ruihhlo thatlohzia inzirtirna kalpui dan tur te an sawiho a. Zirlai zingah ruihhlo thatlohzia inzirtirna kengkawhtu tur inruat a ngaih avangin District Education Officer chuan Serchhip District chhunga master volunteer tur mi 50 nominate se, tiin an rel a ni.

Nasha Mukt Bharat hi District tinah kalpui niin thalai te – a bik takin School leh College zirlai te zingah ruihhlo that lohzia inzirtir a, a la ti ngai lo te an fihlim theih nan leh a lo ching dawklak tawh te pawhin an sim theihna tura tan lak chu a thil tum pawimawh ber te zinga mi a ni a. Zirlai te leh zirtirtute zingah programme buatsaih a, club din tur te; ruihtheihthil ti thin zirlai te a tul anga hospital leh rehab centre a inenkawl tura hruai te, heng rehab centre leh counselling an pek thinna hmun vil zui (monitor) te, tlawmngai pawl te leh khawtlang te nena tangho a ruihhlo do dan ngaihtuah te chu a thil tum zinga langsar zual a ni.

Vawiin meeting ah hian District Education Officer, District Medical Superintendent, Social Welfare, YMA, MHIP leh member dangte an tel a ni.

Pr No. 162/2024 (SCP) Dated Serchhip 19th August, 2024
Issued by District Information and Public Relations Officer; Serchhip District, Serchhip.