Press Release (Dated 15th January, 2025)

AH&Vety Minister Pu C Lalsawivunga’n Thenzawl Vety Farm a tlawh

Dated Serchhip, the 15th January, 2025: Vawiin khan Animal Husbandry & Veterinary Minister Pu C Lalsawivunga chuan AH&Vety farm Thenzawl a tlawh a, department hmalakna leh hmalak dan tur te a hmunah a enpui a ni.

AH&Vety Minister chuan “Thenzawlah hian AH&Vety chuan 769 acres a zau ram kan nei a, bul lo ṭantu te leh lo enkawltu kan mi hmasate ka fak hle a ni. Ran vulhtute pawhin he lai hmun hi an chhawr tangkai hle a, chutihlaiin hei aia an chhawr ṭangkaina tur hian hma kan la zel dawn a ni”, a ti. Ṭin 57 a zau ran chaw hmun chu sorkar hmalaknain kum 2024 ah chuan Ṭin 70 hmun siam belhin Ṭin 127 hmun zet a zau ran chaw siamna hmun kan nei tawh a ni, Vety Minister chuan a ti a. Ran chaw hi a ro (dry) hralh chhuah theih tura peih fel a nih tawh thu leh Kg 1,50,000 zet thar chhuah theih beisei a nih thu a sawi. Ran vulhtute awlsam zawk nan ran chaw hi Thenzawl aṭangin Selesih AH&Vety farm – ah lak phei dan ngaihtuah mek a nih thu a sawi bawk.

Minister hian Zo-Sial humhalhna tur atana din Sial Farm hmunhma tlawhin hmathar lakna hrang hrang a enfiah bawk a, Mizo Sial leh Zo Vawk a ral mai lohna tura thawktuten an lo vulh chu thil lawmawm tak a ni, a ti a. He Sial farm ah hian tun dinhmunah Zo- Sial pariat vulh mek a ni a, ti pung zel turin department in hma a lak mek thu a sawi a ni.

AH&VETY Minister chuan Mizoramin Artui kan intodelh theih nan hma an la mek tih sawiin “kumin aṭanga bul ṭan turin Arpui, a tui tam chi nuai khat vulh theihna turin hma kan la mek a, a hmun hma tur pawh kan nei ṭha a, thawktu kan nei ṭha bawk, Mizoramin bung thar kan kai ngei dawn a ni”, a ti a. Sial vulhtute tan Sial Chi liah tur Rashtrya Gokul Mission (RGM) aṭangin siam mek a ni a, hei pawh hi kan tih changtlun zel theih chuan Sial vulhtuten an ṭangkaipui hle dawn a ni, a ti bawk.

Pu C Lalsawivunga hian Kel Vulhna Hmun leh Vety Dilpui a tlawh bawk a. Thenzawl-a A.H.& Vety Department hmun hma tha tak an neih hi tangkai taka hman a nih theih nana ruahmanna hrang hrang kalpui mek a nih thu a sawi bawk a ni.

Pu C Lalsawivunga hi AH&Vety department Addl.Director Pu Sahlu Khaila bakah official dang ten an ṭawiawm a ni.

Pr No. 11/2025 (SCP) Dated Serchhip 15th January, 2025

Issued by District Information and Public Relations Officer; Serchhip District, Serchhip.