Press Release (Dated 15th Aug 2024)

Serchhipah India Independence Day vawi 78-na ropui taka lawm a ni

Dated Serchhip, the 15th August, 2024: Vawiin khan Serchhip District chhung hmun hrang hrangah India zalenna ni vawi 78 na lawm a ni a. A lawmna pui ber chu Serchhip Sports Complex ah neih niin khuallian LAD Minister Pu C.Lalsawivunga chuan zing dar 10 khan hnam puanzar a pawt pharh a ni.

Pu C.Lalsawivunga chuan Serchhip District mipui zawng zawngte chibai bukin, India Independence Day lawmtute duhsakna a hlan a. India ram khua leh tui ten zalenna kan lo neih theihna tura an theihna zawng zawng hlantute kan hre reng a, zahna chibai kan buk a ni, a ti. Khuallian chuan Serchhip chu District changkang leh entawntlak, India ram pumah za zela teha District zawng zawng zinga ziak leh chhiar thiam tamna ber, ramlai malsawmna dawngtu in ni a, hmasawnna pawh chak takin a kal mek zel a, hmachhawp tam tak a la awm chho zel dawn, a ti a. Chutih mek laiin kan ram leh hnam hmasawnna turin mawhphurhna lian tak mi tinte koah a innghat tih hre reng tur leh kan ram tana tih theih kan neih apiang thahnemngai taka hlenchhuak tura inhlan thar turin mipui te a sawm a ni.

India rama nurse chawimawina sang Florence Nightingale Award 2024 dawng tura Pi H.Mankimi, Serchhip IOC Veng thlan chhuah a ni chu chhuanawm a tih thu Minister Pu C.Lalsawivunga chuan a sawi a, Mizoram Khawpui Fai Inelna-2023 ah Serchhip chuan Lawmman pa 1- na an dawng thei chu District dang te tan pawha entawntlak a tih thu khuallian chuan a sawi a ni.

Serchhip District leh Mizoram chhung khaw hrang hrangah August ni 13-15 chhungin Art and Culture Department bul tumin ‘Hnam Puanzar zar beihpui thlakna’ Har Ghar Tiranga campaign neih a nih thu Minister chuan a sawi a. He campaign hnuaiah hian in tina hnam puanzar zar te, Tiranga Yatra (kawng zawh) te, Tiranga Concert te, Tiranga thutiam (Pledge) chhamrualna te, hnam puanzar nena selfie emaw thlalak te tih tur niin heng ruahmanna te inlungrual taka mipuiten an tihlawhtling chu lawmawm a tih thu Pu C.Lalsawivunga chuan a sawi a ni.

AH&Vety Department hnuaia hmalakna sawiin Minister chuan artui, ar leh sa a ram intodelh turin Department chuan hma an la thar mek a, ran chaw a intodelh tura hmalakna thar neiin Thenzawl Vety ramah Fodder Plant chin mekna bakah kumin chhungin tin 72 a zauah hma thar lak a ni a, vaimim leh bekang a intodelh turin hmalakna kalpui tum mek a ni bawk, tih a sawi a. “ASF avangin vawk vulh tuten an tuar nasa hle tih sawrkarin a hria a, kan Chief Minister zahawm tak hmalaknain Central lamah Rehabilitation dil mek a ni a, State of Calamity a puang tura hmalak mek a ni”, a ti.

Pu C.Lalsawivunga chuan 1953 Village Council Act Amendment-na tur buaipui niin, Consultation Meeting neih a ni tawh, a ti a. VC dan thar tha tak kan neih theih nan Consultation Meeting pawh koh leh thuai tum a ni a, Village Council tinah Panchayat Bhavan sa vek tura ruahmanna siam niin RGSA Scheme hnuaiah Village Council te hman tur computer set 86 chu tun August thla chhung hian VC 86 te hnenah pek an nih thu leh 15th Finance Commision Grant pawh chak taka kalpui mek a ni, tih a sawi a ni.

Khuallian Pu C.Lalsawivunga chuan Serchhip District mipuite mamawhna hriaa sawrkarin Serchhip District Hospital khum 100 awm theihna tur, a tira duan aia changtlung zawka sak dan tur ruahmanna a siam te leh building thiah zawh fel a ni ta te chu lawmawm a tih thu a sawi a. Hriselna kawngah District-in hma a sawn theih nan Medical Officer leh Health Worker te dah belh an ni a, Paediatric ICU hawn a ni ta te chu hriselna kawnga District hmasawnna lawmawm tak a nih thu a sawi a ni.

Minister chuan sawrkar department hrang hrang ten Serchhip District hmasawnna atana hna an thawh dan te leh an hmachhawp te a tarlang a. Kut hnathawktuten hmasawnna rahbi thar an kai theihna tura sawrkar hmalakna pawimawh tak Bana Kaih – Hand Holding Policy hnuaia sawrkar ruahmanna te a sawi a. Serchhip District chhungah Mizoram Chief Minister, Serchhip bialtu MLA ni bawk kaihhruainain hmasawnna hna hrang hrang thawh mek a ni, a ti.

Serchhipa Independence Day lawmna programme-ah hian parade contingent 15 an awm a, unarmed contingent 4, school contingent 10 leh band party pakhat an awm a ni. Unarmed Contingent ti tha ber lawmman dawngtu chu Little Flower Convent School Scouts and Guides an ni a, Govt High School NCC ten lawmman pahnihna an dawng a, lawmman pathumna dawngtu chu Marian High School NCC Air Force Wing te an ni. School Contingent te zingah pakhatna lawmman dawngtu chu Goodwill English Academy an ni a, pahnihna Brilliant Higher Secondary School niin Government Higher Secondary School ten lawmman pathumna an dawng a ni.

Vawiin hian hna thawh that vanga chawimawina sang Governor’s Silver Medal chu Havildar H.Zomuanthanga, Police Training School, Thenzawl chuan a dawng a. Independence Day pual Tennis Tournament lawmman sem a ni bawk a. Heng medal leh lawmman te hi khuallian Pu C Lalsawivunga’n a sem a ni.

Vawiin Independence Day lawmna ah hian Serchhip Sub Headquarters YMA Cultural troupe te chuan hnam lam hmuhnawm tak chi nga- Khuallam, Sarlamkai, Khuai Lam, Chai leh Chheih lam te an entir bawk a ni.

Pr No. 160/2024 (SCP) Dated Serchhip 15th August, 2024
Issued by District Information and Public Relations Officer; Serchhip District, Serchhip.