Press Release (Dated 11th November 2024)

Tour Itinerary Creation Competition-a lawmman pakhatna dawngtu Serchhip District chuan DC hoin lawmna hun an hmang

Dated Serchhip, the 11th November, 2024: Mizoram Tourism buatsaih, Mizoram District tin te inelna Tour Itinerary Creation Competition ah Serchhip District chuan lawmman pakhatna a dawng a. Vawiin khan Serchhip DC Pisapui Hall ah Serchhip DC Pu Paul L.Khuma hoin a lawmna ropui takin an buatsaih.

Serchhip DC chuan Tour Itinerary Creation Competition-ah Serchhip District-in lawmman pakhatna a dawng chu DC Office chauh ni lo, Serchhip District mipuite tana hlawhtlinna ropui tak a ni, a ti a. He competition-a lawmman pakhatna dawng thei tura tha thawhtute zawng zawng chungah lawmthu a sawi a ni. Serchhip District chuan khualzinmite hip turin hmunhma a nei tha em em a, keini a mi chengten ngaiah kan lo neih thil tam tak hi state pawn atanga tourist lo kalte tan chuan thil mawi leh hmuhnawm a tling a ni, a ti a. Khuanu min duansak sa hmun mawi tak tak kan neih te hi kan tihlar thiam a, khualzin lo kal apiang te kan dawnsawn that a, lo kal nawn an chakna tura kan duat thiam a pawimawh a ni, a ti. Pu Paul L Khuma chuan Tourism Industry hmasawn nasatzia sawiin khawvela industry thang chak ber palina a ni, a ti a. Sum tam tak thawhchhuah theihna remchang a nih avangin keini Serchhip District mipuite pawhin tourism sector a chak taka hma kan sawn theihna turin hmathlir thui tak neiin, khualzinte buaipui dan inzir te, social media hman tangkai te kan inzir zel a tul a ni, a ti.

District-Wise Tour Itinerary Creation Competition vawikhatna hi November ni 5, 2024 zan khan Ignite Studio, Khatla-ah Tourism Department in a buatsaih a. He competition ah hian Serchhip District aiaawhin Additional DC Pu Lalrinzuala leh Sub Deputy Commissioner Dr C.Vanlalchhanhimi te an thawkchhuak a. Lawmman 1-na lain pawisafai cheng 30,000 an dawng a ni.

Vawiin a lawmna programme hi Additional DC Pu Lalrinzuala chuan a kaihruai a. Tourism Department-a Deputy Director Dr. R Lalrinchhani chuan thusawiin Serchhip District-in tourism hmasawnna atana hmunhma a neih thatzia te, a bik takin Thenzawl chungchang sawiin Sawrkar Laipui Ministry of DoNER hnuaiah Global Model Site atan Thenzawl chu thlan a nih thu a sawi a ni.

Dr C.Vanlalchhanhimi pawhin Tour Itenerary Competition-a an tel dan chanchin tawi report-in Power Point Presentation a pe a. Mizoram Aero-Sports Association President Pu J.Vanlalliana pawhin Serchhipa International Paragliding Accuracy Championship neih tur chungchang te, paragliding kaihhnawiha Serchhipin Tourism potential a neih thatzia te a sawizau bawk a ni.

Tourism-a Serchhip District-in hma a sawn zel theih nan vawiin programme-ah hian officer rual te leh khawtlang hruaitute, MJA te leh tlawmngai pawl aiawh kalkhawmten sawihona hun an hmang zui a ni.

Pr No. 249/2024 (SCP) Dated Serchhip 11th November, 2024
Issued by District Information and Public Relations Officer; Serchhip District, Serchhip.