Press Release (Dated 10th December, 2024)

NCORD Hmalakna Thlirho

Dated Serchhip, the 10th December, 2024: Serchhip District Narco Coordination Committee (NCORD) te chu an Chairman Pu Paul L.Khuma hoin vawiin khan Serchhip DC Meeting Hall ah an thukhawm.
Bawrhsap Pu Paul L Khuma chuan ruihhlo dona kawnga sawrkar, khawtlang leh mipui tanhona a pawimawhzia hre thar leh turin mipuite a chah a. Social media lama awareness campaign neih mek te, police leh excise department hmalakna te, Drug Inspector te leh YMA hmalakna te fakawm a tih thu a sawi a. Ruihhlo do hneh tur hian kil hrang hrang atanga hmalakna kalpui leh tanho a pawimawh a ni, a ti.
Meeting hmasa in a lo rel tawh angin Sr CMO Serchhip District hmalakna in Food and Drug Inspector te chuan August atanga November thla chhungin H&H1 damdawi dawr 31 zingah 23 an endik a. Thenzawlah dawr 3, Serchhip Dinthar Vengah dawr 1 leh Chhiahtlangah dawr 2 atangin abusive drugs – spascare, alprazolam, dolphen leh a dangte engemawzat an man a ni. Danin a phut angin CCTV hi pharmacy 25 ah vuah a ni tawh a, hei hi za zelah 80.64% a ni.
National Tobacco Control Program hnuaiah awareness campaign hi school 22 leh biak in 1 ah neih a ni.
ND&PS Act hnuaiah Excise & Narcotics chuan 27.07.2024 atanga vawiin thlengin case 14 an ziaklut a, dan bawhchhia a puh mi 19 (mipa 13 leh hmeichhia 6) manin, Heroin gram 884.34 an man a ni.
Serchhip Police te hian kumin chhungin ND&PS Act hnuaiah case 12 ziaklutin mi 16 an man a; heroin gram 258.47 leh ganja kg 3.12 an man a ni. MLP Act hnuaiah case 15 an ziaklut tawh a, mi 21 an man a. Awareness Campaign hi Serchhip District chhungah tum 18 an nei tawh a ni.
Ruihhlo dap chhuahna kawnga thawhhona chungchang meeting-ah ngaihtuah a ni a. BSF, Assam Rifles, Excise & Narcotics te leh Police Department tanghoin Joint Operation neih thin ni se tiin an rel a ni.
Ruihhlo dona atana ruahmanna Action Plan sawizau a ni a. Excise, police leh YMA tanghoin Ruihhlo Do Squad din niin, drug addict te fuankhawmna hmun vil uluk zel an tum a. Addict te hi a hming hmerha chhinchhiah mek an ni a. Drugs hlauhawmzia inzirtirna ngawrh taka kalpui mek a ni bawk.
Drugs chungchanga Awareness campaign hi department ten an remchan dan angin a hrangin an kalpui thin a. Tum thuhmun theuh an nih avangin a hrang hranga kal loin a huhoa awareness campaign neih dan zawn ni se tiin meeting ah hian an rel a ni.

Pr No. 289/2024 (SCP) Dated Serchhip 10th December, 2024
Issued by District Information and Public Relations Officer; Serchhip District, Serchhip.