Press Release (19th July, 2024)

Education Minister Dr Vanlalthlana’n Serchhipah Educator Enhancement Workshop a hmanpui:

Dated Serchhip, the 19th July, 2024: Vawiin chawhnu khan Education Minister Dr Vanlalthlana chuan Serchhip Teachers’ Association buatsaih Educator Enhancement Workshop a hmanpui a. He program hi HD Rosanga Multipurpose Hall, Govt Serchhip College ah neih a ni.

Dr Vanlalthlana chuan Mizorama zirna siamtha turin sawrkarin theihtawp a chhuah mek a, kum 3 chhunga hma an lak dan tur ruahmanna siam a ni tawh, a ti. Zirtirtuten quarters an neih loh avanga harsatna an tawh dan te sawrkarin a hriatpui a, quarters 120 sakna tur an dil thu leh Chief Minister pawhin a phur pui thu a sawi a. School 50 sak that dan tur pawh ngaihtuah a nih thu leh Serchhip District chhunga school te pawh engemawzat an tel thu a sawi. Education Minister chuan zirna siamtha turin sawrkar chuan an theih ang tawkin hma a la dawn a, amaherawhchu zirtirtuten mawhphurhna lian tak an nei dawn, tih a sawi a. Zirtirtuten an tih tur an tih loh chuan sawrkar hmalakna a thlawn dawn tih hria a, theihtawpa tang turin Dr.Vanlalthlana chuan zirtirtute a fuih a ni. Minister hian Training and Posting Rules, 2024 duan mek a nih thu te, zirtirtu pakhat chauh awmna school tih reh an tum dan te, casual teachers ah politics a induhsakna tel lova zirtirtu lak an nih thu te leh sawrkar hmalakna dang te a sawi a. Zirtute pawhin theihtawp chhuaha sawrkar hmalakna te thlawp turin a sawm a ni.

Zirtirtu tha ni turin inzir thar peih mi nih a pawimawh, Education Minister chuan a ti a. Naupangte enkawlna kawngah zirtirtute mawhphurhna a sang em em tih hi inhrilh nawn fo a tul a ni, a ti. Zirtirna kawngah chauh lo pawh zirtirtu chu a inchhiar zau tur a ni a, khawkhat pa rawn an nih thin avangin sawrkar scheme hrang hrang pudarhtu a tang turin Dr Vanlalthlana chuan kalkhawm te a fuih a. Mipui mimir tana sawrkar laipuiin scheme a siamte zirchiang a, zirtir chhawngtu ni turin a chah a ni.

Vawiin programme ah hian STA Award sem a ni a. Mizoram University Examination, 2024 a Government Serchhip College atangin Department of Chemistry a palina (4th rank) hauh tu K.Lalrindiki, pakuana (9th rank) Lalrampari te bakah HSLC exam a pasarihna dinhmun luahtu Goodwill English Academy zirlai Zomuansanga te hnenah award hi hlan a ni.

Serchhip Teachers’ Association ah hian Serchhip khawpui chhunga Elementary atanga College thleng, private leh sawrkara zirtirtu zawng zawng an tel a. September 5, 1973 khan ding tanin kumin hi an kum 50-na champha a ni. He pawl hian zirtirtute hamthatna mai bakah zirlaite hamthatna a ngaihtuah a, Serchhip khawpui chhunga zirnain hma a sawn theihna turin din a ni.

Vawiin programme-ah hian Higher&Technical Education Dept. Joint Director Dr Lalthansangi Fanai leh Education Minister Dr.Vanlalthlana te chu Resource Person an ni a. Serchhip DEO Pu Lawmawma pawhin zirtirtute fuihna thu a sawi a ni. Programme hi an pawl President Pu VL.Chanchinthahrilmawia’n a kaihruai a. Secretary Pu John Lalvenzela’n an pawl hmalakna tlangpui a sawi a ni.

Pr No. 136/2024 (SCP) Dated Serchhip 19th July, 2024
Issued by District Information and Public Relations Officer; Serchhip District, Serchhip.