Press Release (19th July, 2024)

Education Minister Dr Vanlalthlana’n DIET, Serchhipah Mission Lab Wave 2024 a hawng:

Dated Serchhip, the 19th July, 2024: Vawiin chawhma khan Education Minister Dr Vanlalthlana chuan DIET, Serchhipah Mission Lab Wave 2024 a hawng.

Dr Vanlalthlana chuan Serchhip DIET hmalakna fakawm a tih thu sawiin kal dan phung pangngai zawh satliah chauh duh tawk lovin ngaihtuahna thar leh tihdan phung danglam leh tha zawk lalut a, zirtirtu te training an pe thin chu lawmawm a tih thu a sawi a. Zirtir kawngah a tiha tih (practical approach) a pawimawh a, mihringte hian a chhiara chhiar leh ngaihthlak ngawt aiin a taka kan tih hian kan hre bel zawk tiin practical uar turin zirtirtute a fuih. Awmze nei zawka naupang te kan zirtir theih nan ngaihthlak tam a tul a, naupang ten harsatna an neih te leh sawi duh an neih te ngaihthlak kan uar lehzual a ngai, Education Minister chuan a ti a. Zirtirtute chu an nun vawng uluk tur te, lawmna nun neih a pawimawhzia zirtir uar tur te; a hun leh hmun a zira danglam ngam, a tul a nih phawt chuan danglam lo ngam ni tura an zirlaite buatsaih turin a fuih a ni.

He huna thusawitu dang Education Consultant Rev. Dr. K.Thanzauva chuan zirtirtu ni tura inchher mek an nih angin DIET-a training mek te chu zirtir hna an thawh tak tak hunah ram hmangaihna thinlung pua zirtir hna thawk turin a chah a. “Kan ram siamthatna tura pawimawh ber chu zirna tha a ni a, kan ram dinchhuahna tur a ni tih rilru pu chungin zirtir rawh u” tiin kalkhawmte a fuih a ni.

DIET Serchhip hi kum 2006, April ni 22 khan din a ni a. April 15, 2013 khan DIET puitlingah hlankai a ni. Pre Service Teacher Education Course hawn phalna hi National Council for Teachers Education chuan March 3, 2016 khan a pe bawk.

Mission Lab Wave 2024 hi Tata Trust CSR Fund hmang tangkaia din a ni a. Serchhip District chhungah Middle School level-ah te Science Lab a awm loh avangin naupangin science zirna tha zawk an neih theih nan Lab din niin hmanrua a changtlung thei ang bera lakhawm a ni. A bul tanna atan tunah hian Serchhip District chhunga school hrang hrang 36 thlan chhuah an ni a. Heng school a teacher te hi a tahtawla training pek an ni ang a. Lab hmanrua te pawh naupang te hman turin thawn chhuah leh hawh chhuah tir an ni dawn a. A tul dan a zirin DIET a thawktute hian Lab bungrua te nen heng school te hi an pan thin dawn a ni.

Mission Lab Wave 2024 hawnna inkhawm hi DIET Serchhip Hall-ah neih a ni a. DIET Lecturer Pu John Zorammawia’n program hi kaihhruaiin Pu Lalawmpuia, lecturer chuan DIET Serchhip chanchin tlangpui leh Mission Lab Wave 2024 chungchang a sawifiah a. An Principal Pi Lalmuanpuii chuan lawmthu sawiin hun hnung a khar a ni.

Pr No. 135/2024 (SCP) Dated Serchhip 19th July, 2024
Issued by District Information and Public Relations Officer; Serchhip District, Serchhip.