PR Dated Serchhip, the 24th February, 2026

Serchhip DC in Leng khua tlawhin VVP II hmanga hmasawnna hna thawh dan tur a hmunah a en
Dated Serchhip, the 24th February, 2026: Serchhip DC Pu Paul L Khuma chuan vawiin khan Leng Khua a tlawh a. Vibrant Villages Programme II (VVP II)-a khaw thlan Leng khuaa Village Action Plan a thun tur ngaihtuahin khawtlang hruaitute nen Leng VC House ah an thukhawm a ni.
Vawiin thutkhawmah hian Leng khuaa Village Action Plan siampui turin DC bakah line department te, VC te leh tlawmngai pawl te an tel a. Department leh Village Council te chuan khaw chhung hmasawnna proposal an lo thehlut tawh a. Vawiin hian DC leh a team te hian a hmunah an enpui a, Leng khaw hmasawnna tura mamawh dangte an sawipui nghal bawk a ni. An rawtna thehluh zingah hian Community Hall sak te, Leng to Zuva inkar kawng siam te, tui dahkhawlna tur Tanky lian siam te, sub-centre leh school cheithat te leh thildangte a tel a. Heng an rawtna hrang hrangte hi District Committee chuan a enzui leh dawn a ni.

Virbrant Village Programme (VVP)-II kalpuina atan hian Mizorama RD Block 16 atangin, thingtlang khaw 109-te chu Ministry of Home Affairs-in a thlang a. Serchhip District ah chuan Serchhip RD Block hnuaiah Keitum khua; East Lungdar RD Block hnuaiah Mualcheng, Lungkawlh, Bawktlang, North Vanlaiphai, Leng leh Sailulak te a huam a ni.

India-Myanmar leh India-Bangladesh ramri khuate huam turin Vibrant Village Programme II hi kum 2024 atang khan kalpui tan niin Serchhip District chhunga khaw sarih (7)-te hi a huam tel ta a. Central Sector Scheme a nih angin funding hi sawrkar laipuiin 100% a tum dawn a ni. Sawrkar laipui scheme kalpui mek sa te nen a theih chin chinah kaihkawp (converge) tur a ni a. Convergence a rem lo a nih chuan, MHA level ah endik leh tur a ni.
Pr. No. 54/2026 (SCP) Dated Serchhip 24th February, 2026
Issued by District Information and Public Relations Officer; Serchhip District, Serchhip.