Press Release (Dated 8th November 2024)
Serchhipah Mega Mock Drill neih tur atana inbuatsaihna meeting nei
Dated Serchhip, the 7th November, 2024: Vawiin khan Serchhip DC Pu Paul L.Khuma chuan Serchhip DC Meeting Hall ah Mega Mock Drill neih dan tur chungchang sawihona thutkhawm pawimawh a ko a. District Disaster Management Authority (DDMA) member te bakah department hrang hrang hotute an tel a ni.
Serchhip DDMA Chairman Pu Paul L.Khuma, District Bawrhsap chuan chhiatrupna a lo thlen thulha inrinlawkna leh hmachhawn dan tur inbuatsaih hi District thuneitu zawng zawng te tihtur a ni a, mega mock drill neih tur pawh lemchanna ang chauh ni rih mah se a tak taka thlengah ngai a, tihtakzeta an mawhphurhna theuh hlenchhuak turin kalkhawm te a sawm a. Chhiatrupna a lo thlenin District Administration chauh ni loin department tin hotute an pawimawh em em dawn a, chuvangin thawhhona tha tak nen mega mock drill hlawhtling taka kan neih theih nan inbuatsaih theuh turin member te a sawm a ni.
Mizoram pum huapin November ni 14, 2024 hian Mega Mock Drill neih tur a ni a. Thlir lawkna hun Table Top Exercise chu November ni 12, 2024 hian State Disaster Management Authority leh National Disaster Management Authority te kaihhruaiin neih a ni ang.
He Mega Mock Drill-ah hian Serchhip town chhungah chuan Serchhip Auditorium, Serchhip Hmar Veng, Serchhip District Hospital, New Serchhip South leh Presbyterian English School ah te neih a ni dawn a. District Hospital leh Presbyterian English School ah te hian building chim lem chan a ni ang a, Serchhip Hmar Vengah lei min, New Serchhip South ah ram kang avanga chhiatrupna thleng hmachhawn dan nunchan zir a ni ang. Heng bakah hian leimin avangin 132 KV line transformer chim chhe vek tur leh DC Tlang Reservoir 2,00,000 ltrs tui dahkhawlna pawh chim chhe vek anga lemchan a ni dawn bawk a ni.
Chhanchhuahna hmanraw lakkhawmna leh dahkhawmna hmun tura ruat Staging Area atan Leisekawt Field hman a ni dawn a. Zing dar 10:30 ah siren tihrik a ni dawn a ni.
Mega Mock Drill a Department hrang hrang te mawhphurhna tur vawiin hian thlir ho a ni a, a tul ang zela hmalak dan turte pawh sawi ho nghal a ni.
Pr No. 247/2024 (SCP) Dated Serchhip 7th November, 2024
Issued by District Information and Public Relations Officer; Serchhip District, Serchhip.
