Press Release (Dated 2nd September, 2024)

Serchhipah Quick Response Team (QRT) te tan training buatsaih

Dated Serchhip, the 2nd September, 2024: Vawiin khan Disaster Management & Rehabilitation Department Serchhip leh Disaster Management Authority, Government of Mizoram tangkawpte buatsaihin chhiatna thlen palha chhanchhuah hna thawktu tur Quick Response Team tan DC Conference Hall-ah Training buatsaih a ni.

Training hawngtu Pu Malsawmtluanga, Joint Director, DM&R chuan QRT hi mumal taka neih anihna ala rei lo hle a, district zawng zawngah QRT tha taka kalpui tura hmalak mek niin, Aizawl pawna mumal taka QRT kan neihna hmasa tur an nih dawn avangin midang entawn tlaka an awm a ngai dawn a ni, a ti a. An hna thawh chu sawrkar hna, a ngheta thawk an ni lo, tih rilru putna chi a ni lo tih vawng tlat tura chahin; sum leh paia hlawkna lam in ngaihtuah chuan in thawk rei peih lovang, tuina tak tak leh inpekna nena thawh chi a ni, a ti a ni. An hna hi nunna thapa thawh a tul chang a awm fo dawn a, rilru leh taksa hrisel tak neih a ngai a; zuk leh hmuam, ruihtheih thila fifhlim a, hriselna ngaihpawh turin a chah. Hna harsa leh hautak takte tih a tul huna sawrkar leh mipuite hmachhuan tur an nih hria a, midang zawng zawng aia rintlak leh hmahruaitu ni tura inbuatsaih tura chahin, thahnemngai taka training nei turin a fuih a; harsatna tawkte a langlo lama tanpuitu tur an ni dawn a, fakna leh chawimawina an dawng kher dawn lo tih hre saa, inpekna tak tak leh tuina tak tak nena thawk tura chahin, rilru hrisel leh huaisenna nen, QRT entawn tlak leh district mipuite innghahna tlak ni turin duhsakna a hlan a; Training tluang taka an neih theih nana duhsakna hlanin training a hawng a ni.

Press Release (Dated 2nd September, 2024)
Deputy Director Pu Lalrokima Chenkual, DM&R chuan chhiatrupa a thlen changa chhanchhuah hna thawk tur sipaiin Quick response Force an neih zulzuiin Quick Response Team hi Disaster Management Authority in a din a nih thu a sawi a. Kum 2019 khan district zawng zawngah Quick Response Team din vek tura rel lo ni tawhin, a kalphung turte pawh duan a nih tawh thu a sawi a. QRT member turte hi anmahni inpekna mai bakah an chhungte remtihna nen thlapa tih nise an duh thu sawiin, chhanchhuahna hna an thawh laiin hliam tuar ve thei annih avangin sawrkar atangin zangnadawmna te pawh buatsaih sak an nih bakah, district lama Disaster Management & Rehabilitation Department ten insurance lo tihsak se an duh tih a sawi bawk.

Addl. DC Pu Lalrinzuala chuan training hawnna hun hi a kaihruai a, vanneihthlak takin Serchhip districtah chhiatna nasa tak kan nei tam lova, mahse nasa taka ruah a sur thin avangin beisei loh lama chhiatna nasa zawk thleng palh thei anih avangin DEOC leh QRT te tan training neih a, a tul huna chhuak mai thei tura inpeih a tul avangin training hi buatsaih ngei nise tia hmalak a nih thu a sawi. He hunah hian SDO(S) Pi Rebecca Laldinmawii Hrahsel, SDC Dr. Marylin Lalruatkimi te an tel a. Pu Zothansanga Hmar chuan lawmthu sawiin he hun hi a khar a. Training hian chawlhkar khat chhung a awh dawn a ni.

Pr No. 177/2024 (SCP) Dated Serchhip 2nd September, 2024
Issued by District Information and Public Relations Officer; Serchhip District, Serchhip.