Press Release (Dated 13th December, 2024)

Chief Minister Pu Lalduhoma’n Krismas leh Kumthar luanchhuah programme hmanpui
Dated Serchhip, the 13th December, 2024: Chief Minister Pu Lalduhoma chuan vawiin khan Serchhip DC Office buatsaih Krismas leh Kumthar luanchhuah programme ah khuallian niin mi 121 leh Home pahnih hnenah Krismas thilpek a hlan.
Serchhip DC Pisapui Hall a programme buatsaihah Pu Lalduhoma chuan luanchhuahna programme hlu tak an nei chu a lawmawm em em a, buatsaih duhna thinlung an pu ringawt pawh rawngbawlna ropui a tling tawh a ni, a ti. Nun danin a zir loh vang te, hrisel loh leh vanduaina avanga rahbi tleu, hunpui lo thleng tur huphurh hluah hluah chhungkua tam tak an awm thin a; chung mi te thleng phaka sawrkar leh tlawmngai pawlte kan kun hniam a tul a ni, Chief Minister chuan a ti. Khawtlang hruaitu, kohhran leh tlawmngai pawlte hnenah mi rethei tanpui tura chona siamin “Kan veng leh khuaah ngaihsakna dawng ngailo an awm a nih chuan Lal Isua zirtirna kan bawhchhia a ni”, a ti. Sawrkar, kohhran leh tlawmngai pawl hmalakna hrula samari mi tha hna lo thawk reng thin te chu chawimawi tlak a tih thu a sawi bawk.
Chief Minister Pu Lalduhoma chuan kan hnam leh khawtlang chawimawitu inkhel thiamte lawmpuina pek an ni chu lawmawm a tih thu a sawi bawk a. An talent tipung zel tur leh tan la sauh sauh turin a chah a. Kalkhawmte Krismas leh kumthar chibai a buk a ni.
Serchhip DC Pu Paul L Khuma chuan thilpek an sem chhan sawiin Isua Krista kan tana khawvela a lo kal ni – Krismas hian mi tin thinlungah hmangaihna te, thilphalna te a tuh thin a; District Administration pawhin Krismas denchhen a hetiang hun an buatsaih thei leh Chief Minister hialin a telpui avanga lawmawm a tih thu a sawi a. Krismas leh Kumthar hunpui lo thleng turah rilru thar pu theuh turin kalkhawm te a sawm a ni.
Serchhip Town area a Village Council 14 atangin mi 5 theuh, belhkhawmin 70 in Krismas thilpek hi an dawng a. Thenzawl atangin mi 30, Neihloh khaw mi 10 leh Buangpui khua mi 11 ten thilpek hi an dawng a. Zoar Urban Deprived Children’s Home leh Unity Orphanage Home te hnenah sumfai hlan a ni bawk.
Vawiin programme ah hian 47th Yonex Sunrise Junior National Badminton Championship 2024, Odisha-a neih zawh taka Girls Doubles Champion Lalrempuii; 47th Yonex Sunrise Junior National Badminton Championship Bronze Medalist, North East Zone Inter State Junior Boys Champion ni bawk Lalpekhlua Sailo & Malsawmhlua; National Badminton Championship (under 11) Mizoram Team a tel Lalruatkimi te chawimawina hun hman a ni bawk.
Vawiin programme hi Additional DC Pu Lalrinzuala’n a kaihruai a. SDO (Sadar) Pi F Lalnisai’n lawmthu sawiin hun hnung a khar a ni.
Pr No. 295/2024 (SCP) Dated Serchhip 13th December, 2024
Issued by District Information and Public Relations Officer; Serchhip District, Serchhip.