Press Release (Dated 10th October,2024)

Mizoram State Project Monitoring Committee ten Chhiahtlang-Serchhip-Keitum kawngpui siam mek an endik

Dated Serchhip, the 10th October, 2024: Vawiin khan Er.Lalthanzuala Ralte, Secretary, Mizoram State Project Monitoring Committee (MSPMC) hovin MSPMC member leh task force ten NH-54 kawngpui siam mek Chhiahtlang-Serchhip-Keitum road an endik.
MSPMC team te chuan kawngpui siam mek hi a hmunah tlawhin chipchiar takin an en a. Lei tawlh leh retaining wall chim leh tlabal te, kawngpui bawl leh khuar (potholes) tam lutuk te, leimin venna atana an dah gabion wall chim te bakah leitawlhin a nghawng thildang te a hmunah an endik a. Chhiahtlang atanga tanin Serchhip leh Keitum thlengin uluk taka an endik hnuah NHIDCL aiawhte leh contractor te nen Serchhip DC Meeting Hall-ah meeting an nei chhunzawm nghal a ni.
Serchhip DC Meeting Hall a thutkhawm hi DC Pu Paul L.Khuma’n a kaihruai a. MSPMC Member te hian an hmuh dan te sawiin contractor ten kawng siamna leh retaining wall siamna atana an hmanraw hman (material) leh an hnathawh quality an duh khawp loh thu an sawi a. Material tha karah material tha tawk lo hman a awm thin thu te, engineering defect a awm nia an hmuh thu te, pavement innghahna lei insawh nghet tawk lo (subgrade failure) a awm thu te, tuihawk luan kawr an siam ten duhthu a sam loh thu leh siam that leh cheithat ngai thil tam tak an hmuh thu an hrilh a. A leilung zirchianna an neih that leh that loh thu te, soil test an neih dan te zawtin laboratory a test an neih zawng zawng te kimchang taka thehlut turin an hriattir a ni.
Secretary Er.Lalthanzuala Ralte chuan NH-54 kawngpui an endik chhan sawifiahin fur khat pawh daih mang lo, kawng siam zawhfel a nih hmaa kawng chhia tam lutuk te, a dotu bang chim nasa lutuk te leh harsatna dang thlengte avangin Chief Minister Pu Lalduhoma duh dan anga endik tura lo kal an nih thu a sawi a. NHIDCL leh contractor te chu an contract chungchangah leh court hmaah harsatna an hmachhawn lohna turin a tha thei ang bera siamthat hna rang taka thawk turin a hrilh a ni. He kawngpui hmangtu Mizoram mipuite chuan kawng quality tha leh tlo siam turin beiseina sang tak an neih laia hun reilote chhunga hmun tam takah kawng a chhe ta mai chu mipuite an lungawi loh thu a sawi a. Kawng hmangtu ten harsatna leh chhiatna nasa zawk an tawh loh nan a repair hna rang taka thawk tur te, an hnathawh dan tur ruahmanna chipchiar a rang thei ang bera buatsaih tur leh, Serchhip DC leh MSPMC hnena thehlut turin a hriattir a. Kawng repair hna an thawhnaah harsatna an nei a nih chuan MSPMC chuan tanpui turin a inhawng reng tih hrilhin, quality tha taka hna thawk turin a hriattir a ni.
Contractor te pawhin ruah sur nasa avanga harsatna an tawh dan te an thlen a. A theih chin chinah kawng chhia siamthat hna an thawh mek thu leh, furpui a reh veleh rang taka chak leh zuala an thawh theih an inbeisei thu an sawi a ni.
Vawiina kawngpui endiktute zingah hian MSPMC Member- Er.H.Laldintluanga, Er Vanlalneiha Ralte, Er Lalrinawma, Er Laltlanthangi Ralte bakah MSPMC Task Force member te, MZU leh PWD lama mithiamte an tel a ni.

Pr No. 213/2024 (SCP) Dated Serchhip 10th October, 2024
Issued by District Information and Public Relations Officer; Serchhip District, Serchhip.