Press Release (10th December, 2024)

Serchhip DC in International Paragliding World Championship a hawng

Dated Serchhip, the 10th December, 2024: Vawiin khan Serchhipah International Paragliding World Championship 2024 bul tan a ni ta a. Bawngchawma Pilot te thlawhchhuahna hmun ‘take off point’ ah programme tawi buatsaih niin Serchhip DC Pu Paul L.Khuma, International Paragliding World Championship Organising Committee Chairman ni bawk chu khuallian a ni a. Pilot thlawk chhuak hmasa ber te hi a vailiam a ni.

Serchhip DC Pu Paul L.Khuma chuan Mizoram Chief Minister Pu Lalduhoma thahnemngaih vang te, Mizoram Sawrkar leh Mizoram Aerosports Association (MASA) te hmalakna avanga International Event Serchhipin a thleng chu lawmawm a tih thu a sawi a. Ram hrang hrang atanga pilot lo kal khawmte hun hlimawm tak hmang tura duhsakna hlanin he championship hi a hawng a ni.

International Paragliding World Championship hi vawiin atanga tanin December 13 (Zirtawpni) thleng inelna an nei dawn a. A kharna programme hi Mizoram Chief Minister Pu Lalduhoma hoin Zawlpui leileta pilot te tumna hmun landing site ah neih a ni dawn a ni.

Pilot hi India ram atangin 17 an tel a, an zinga 8 hi Mizoram atanga tel an ni. South Korea, Nepal, Kazakhstan leh Indonesia atangin pilot an tel bawk a. FAI kaltlangin International Paragliding World Championship a tel tur hian mi 79 inziaklut mahse harsatna hrang hrang avanga India ram rawn thleng thei lo an awm a. Tun tum inelnaa pilot tel zawng zawng hi an zavaiin 30 an ni ta a ni.

International Paragliding Accuray Championship and Air Sport Festival neih chhung hian Zawlpuiah stall chi hrang hrang hawn niin mipui a duh apiang tan ei leh in tur, thei leh thlai, sangha man thar, Serchhip District chhunga an thil siam chhuah chi hrang hrang lei tur a awm a. Nghakuai chiah runpui neih a ni bawk a. Man chawia paragliding a thlawk duh te tan intihsiakna neih zawh atang hian a duh apiang tan chuan theih a ni dawn bawk a ni.

Pr No. 286/2024 (SCP) Dated Serchhip 10th December, 2024
Issued by District Information and Public Relations Officer; Serchhip District, Serchhip.