International Trade Expo – Serchhip District Bawrhsap Pu Paul L.Khuma’n a hawng

Tarchhuah NI : 25/09/2024

Bawrhsap Pu Paul L.Khuma’n Serchhipah International Trade Expo a hawng

Dated Serchhip, the 9th September, 2024: Vawiin khan Serchhip DC Pu Paul L.Khuma chuan Serchhip Auditiorium Ground Floor-ah International Trade Expo a hawng.

Trade Expo hawngtu Serchhip Bawrhsap chuan Zorun Events te thahnemngaihna avanga India ram hmun hrang hrang atanga mipui mamawh lei tur tam tak Serchhipah chhawpchhuah a ni chu lawmawm a tih thu sawiin, a buatsaihtute remhriatna leh taimakna chhuanawm a tih thu a sawi a. International Trade Expo buatsaihtuten market zirchianna an neihnaah Serchhip mipuite chu mi fel leh inhawng tak, thawhpui nuam leh event lian tham buatsaih pawha hlawhtlinpui tham nia an hmuh avanga Expo neih nan an rawn thlang chu lawmawm a tih thu Pu Paul L.Khuma chuan a sawi a ni.

Serchhip mipui ten an mamawh man tlawm zawka an lei theihna tur a nih piah lamah sumdawnna bul tan turte leh sumdawng mekte tan hlawkthlak hle dawna a hriat thu DC chuan a sawi a. Mizoram chhung mai ni lo vairam thleng pawha sumdawnna zauh duh tan te, phai lam atanga bungrua chah lut duh tan te pawh hmelhriat neih zauna leh thawhpui theihna remchang a ni a; vai sumdawng te chu kum tak tak tawnhriat nei tawh, custormer te duat kawngah pawh entawn tlak an nih avangin sumdawnna kawngah an hnen atanga zirchhuah tur a awm ngei a beisei thu Pu Paul L.Khuma chuan a sawi a ni.

Zorun Events buatsaih he Trade Expo hi thla khat awh tura ruahman a ni a. Mizorama lei mai tur awm lo lehkhabu chi hrang hrang te, thawmhnaw te, inchhung bungrua te, choka hmanrua te, khawl thil te, ei tur chi hrang hrang te lei tur a awm a. Stall 40 siamin man tlawm tak takin an bungrua te hi an zuarchhuak a. India thil siamchhuah tha tak tak lei tur a awm bakah ei leh in chitin reng awmna food stall hawn a ni bawk a. India ram hmun hrang hrang Maharastra, Uttar Pradesh, West Bengal, Delhi leh a dangte atanga lo kalten dawr an hawng a; Thenzawl leh Lunglei atangin dawr hawng an awm bawk a ni. Nilengin dawr theih an nih bakah zan dar 9 thleng Trade Expo hi hawn a ni dawn a. A duh apiang tana tlawh theih a ni.

Pr No. 183/2024 (SCP) Dated Serchhip 9th September, 2024
Issued by District Information and Public Relations Officer; Serchhip District, Serchhip.