Press Release Dated Serchhip, the 10th February 2025

Serchhipah Fire Prevention Week hawng

Dated Serchhip, the 10th February 2025: Vawiin khan Serchhip DC Pu Paul L Khuma, Serchhip District Fire Prevention Committee Chairman ni bawk chuan New Serchhip YMA Hall a programme buatsaihah Fire Prevention Week a hawng.

DC Pu Paul L Khuma chuan kangmei chhuak avanga harsatna lo thleng tawh thin te a thlen tawh lohna tur leh kan fimkhur loh avanga chhiatna rapthlak thleng thei laka kan him theih nan sawrkar hotuten kangmei ven hapta – Fire Prevention Week hi kum tin awareness campaign neihna hun atan an buatsaih thin a ni, a ti. Khuarel chhiatna avangin kangmei chhuak ve bawk thin mah se in kang leh ram kang 99% hi in neitute, ram kal te, huan leh lo neitute kan fimkhur tawk loh vang a ni, DC chuan a ti a. Kangmei a chhuah loh nan mi tinin mawh kan phur a; kan hriatna leh thiamna, kan tha seng ila, kan mawhphurhna i hlen theuh ang u, tiin mipuite a sawm a ni.

Serchhip District Fire Prevention Committee Member Secretary Dr R Lalnunrenga, DFO Thenzawl chuan report pe in kalkhawmte lawmna thu a sawi a. Sawrkarin lo hal hun bi a tuk – March 15 hmaa lo hal vek tur te, uluk taka meikawng sial tur te, ram kal te pawhin mei an chhem a nih chuan timit loa kalsan lo turin a chah a ni.

Kalkhawm ten kangmei veng tura thutiam Pledge on Fire Prevention Week, 2025 an nei a. Thutiam chhamrualna hun hi Serchhip Sub Headquarters YMA President Pu Kawlthuama’n a kaihruai a. Thu sawina hun a hmang nghal bawk a ni.

Vawiin programme hi Dr R Lalnunrenga, DFO Thenzawl chuan a kaihruai a. N.Vanlaiphai DFO Pu C.Lalkhawthanga’n lawmthu sawiin hun hnung a khar a ni.