REVENUE DEPARTMENT HNATHAWH DAN CHANCHINBUMITE LEH VC TEN SAWIHO


Dated Serchhip, the 31st October, 2016: Vawiin chawhma hian Serchhip District Assistant Settlement Officer Pu Lalremruata Sailo, MCS Pisaah Serchhip Journalists te, Revenue thawktute leh IPRO, Pu K. Saitluanga ten; Land Revenue and Settlement Department hnathawh dan sawihona hun an hmanga, chawhnu lamah Serchhip Village Council member te nen hun hman chhunzawm a ni bawk.

Pu Lalremruata Sailo chuan, mipuiten in hmun lo ram; dan anga neih dan te, inhlan chhawn dan te, lei leh hralh chungchang te leh thil pawimawh dang an hriat chian tawk loh avangin harsatna an tawk thin a. Hei vang hian chanchinbumite hian in hmun lo ram chungchanga sawrkar dan dinglaite hi chiang takin min hriat sakin, mipuite hrilhhriat kawngah a remchan dan ang zelin min tanpui se, mipuiten harsatna kan tawh tam tak hi sutkian a nih beiseiin inkawmhona hi buatsaih a ni, a ti a. Serchhip District ah Cadastral Survey fel tawh LSC, a neituten an la lakchhuah loh tunhnaiah 300 chuang pek chhuah a nih tawh thu leh, chuti chunga LSC 800 chuang la lakchhuah loh a awm thu a tarlanga, Revenue danah chuan heng LSC te hi a neitute kuta a luh hma chu a neitute anga chhal theih an la nilo a ni, a ti. Tin, an lakchhuah tlai avangin man tlawm taka khul theih reng kha a pung awmin an khul chhuah a ngai ta bawk a, a neitute hian a rang lamin khul chhuak se an that thu a sawi. Surveyor te ram teh dan kal hmang sawiin, The Mizoram Survey Operation and Settlement Act 2003 in a sawi angin ram neitute hian a tehtu tur Surveyor te kalna senso hi an tum tur a ni a, ram teh tur neite chuan hei hi min hriat sak se a duhawm hle a ti bawk. Tin, naktuk atang hian Serchhip bikah in hmun lo ram chhiah chi hrang hrang lakkhawm tan a ni leh dawn a, District chhung hmun dangte chu kum thar atangin lak khawm a ni thung ang. Mipuite chu a hun taka chhiah pe theuh tura ngenin a huna pe lo tan a pung awma pek tho a ngaih avang leh pe duhlote chu an bungrua lilam saka pek luih tir theih an nih bawk avangin harsatna thui zawk tawh ai chuan a hun taka pek hi a nuam hle zawk a ni, a ti bawk.

He inkawm honaah ah hian chanchinbumite hian tul leh pawimawh nia an hriatte sawina hun an hmang ve bawk a. A bik takin mipuiten kokim taka chhiah kan pek theih nana hmalak dan tur an sawi hrang hrangte chu Pu Lalremruata Sailo hian kum thar atanga an kalpui nghal tur thu a sawi a ni.

Chawhnu lamah Serchhip khaw chhunga Village Council te nen Land Revenue and Settlement hnathawh dan chungchang leh naktuk maia tan tur chhiah lak chungchang sawihona hun hman chhunzawm leh a ni a. Village Council member te chu sawrkar dan dinglai chi hrang hrang hrilhfiah niin, mipuiten chhiah tha taka an pek theih nana thawhpuiah Pu Lalremruata Sailo hian a sawm bawk a ni.

Source: DIPR, Serchhip