SERCHHIP DISTRICT DEPUTY COMMISSIONER CHARGE INHLAN


Serchhip, 31st August, 2015 : Serchhip District Deputy Commissioner kalchhuak tur, Pi Juhi Mukherjee, IAS chuan vawiin chhun dar 12:00 khan Pu VL Remliana,MCS, Addl. DC hnenah charge a hlan.

Serchhip District Bawrhsap, Pi Juhi Mukherjee hi National Capital Territory of Delhi ah transfer a nih avangin Bawrhsap thar ruat anih hma a District Bawrhsap hna lo chelh lailawk tur, Pu VL Remliana,MCS, Addl. DC hnenah hian Bawrhsap mawhphurhna hi a hlan a, Pi Juhi Mukherjee chuan Serchhip-a kum hnih leh thla kua a awm chhunga Officer hrang hrang, tlawmngai pawl, Kohhran hruaitute leh mipuite nen thawhhona tha tak an nei chu lawmawm a tih thu sawiin, Serchhip chu nuam a tih thu leh a thinlunga a awm reng tawh tur thu a sawi a, Mizoram a la thlakhlelh thu leh Mizoram sawrkarin a duhsakna kawng tinrengah lawmthu a sawi bawk a ni.

Serchhip District Superintendent of Police, Pu Romil Baaniya, IPS pawhin National Capital Territory of Delhi ah transfer a nih vangin Serchhip District SP mawhphurhna lo chelh lailawk tur Pu Lalbiaktluanga, MPS, Principal, Police Training Centre, Thenzawl hnenah vawiin vek hian charge a hlan nghal bawk a ni.

Vawiin a District Bawrhsap charge inhlanna neih zawh anih hnu hian Bawrhsap kalchhuak, Pi Juhi Mukherjee, IAS leh a pasal Pu Romil Baaniya, IPS te chuan Aizawl panin Serchhip an chhuahsan a, ruahman dan chuan naktip hian Delhi an pan ang. Bawrhsap te chhungkua hi an chenna In atanga an chhuah dawn hian Serchhip a officer te leh khawtlang hruaitu thahnem takin an thlah a ni.

Source: DIPR, Serchhip