WORLD NO TOBACCO DAY SERCHHIP AH HMANG


Dated Serchhip, the 31st May, 2017: Vawiin hian Serchhip DC Meeting Room ah World No Tobacco Day, 2017 chu District Anti Tobacco Control Squad bultumin hman a ni a. Serchhip Bawrhsap Pi Sangchhin Chinzah chu khuallian a ni.

Pi Sangchhin Chinzah chuan, tun hma chuan zuk leh hmuam dona lama hmalakna a tam tawk loh avangin zuk leh hmuam ti kan tam thin hle a. Mahse tun hnuah thawktuten nasa taka hma an han lak chinah chuan hma kan sawn nasa hle a ni, thawktuten chawimawi an phuin ram tana thil tha an thlen hi a sang hle a ni, a ti a. Chutihlaiin hmalakna tur tam tak ala awma, nasa zawka beih chhunzawm zel a tul a ni, a ti. Pi Sangchhin Chinzah chuan District Officers te, chanchinbumite, tlawmngaipawl hruaitute leh kohhran hrang hranga hotute chu zuk leh hmuam do kawnga thawhpuiah a sawm a ni. Khuallian hian tun hnaia dan phal lohva zawrh Gutkha man khawm chi hrang hrang bawm 2440 chu tuia leihin a tichhe nghal a ni.

District Nodal Officer, Dr. K. Lallawmzuala chuan kum kal ta chhunga an hmalakna hrang hrangte tarlangin June, 2016 leh May, 2017 inkarah School Programme 19, Squad Drive 43, vantlang hmuna zial zu man 79, thawktu training vawi 13 leh NGOs te nena training vawi 15 an nei hman a. Legal Metrology Department te nena Joint Drive vawi hnih an neih bakah Food & Drugs Administration ten en tum hnih drive an nei hman bawk. Tin Tobacco Cessation Clinic pantu mi 423 neiin an zinga mi 60 chuan an nghei theih phah a ni. Dr. K. Lallawmzuala hian kumina World No Tobacco Day thupui Zuk leh Hmuam- hmasawnna tithuanawptu (Tobacco- a threat to development) tih thupui hmangin zuk leh hmuam thatloh zia sawina a hmang zui bawk a. Zuk leh hmuam tite chu an chep tial tiala, an chep zawh poh leh midangte tan malsawmna an ni nasa zel tihna a ni a, chuvang chuan mi dangte tana malsawmna ni tam deuh deuh turin an chep telh telh dawn a ni, a ti.

He hunah hian Nl. K. Hmingthansangi, District Consultant, National Tobacco Control Programme chuan vaihlo leh a kaihhnawih thilsiam zuartuten an hriat ngei ngei tur leh an thil zawrha an tarlan tel ngei ngei tur, danin a phut hrang hrang te sawifiahna hun a hmang bawk a ni.

Vawiina World No Tobacco day hmannaah hian District Official pawimawh te, chanchinbumite, tlawmngaipawl hruaitute leh vaihlo leh vaihlo kaihhnawih thilsiam chhuah zuartute an tel a ni.

Source: DIPR, Serchhip